كود -رويتز //
إيلون ماسك حذّر باللي العالم ممكن يدخل فأزمة ديال ضو فـ أقل من 3 سنين، بسبب الاستهلاك الكبير ديال الذكا الاصطناعي لهاد الطاقة ،وقال باللي الشبكات الحالية ما قادراش تواكب هاد الطلب، وهاد الشي يقدر يسبب فانقطاعات كبيرة فالضو وتأثير على الخدمات الرقمية اللي ولات أساسية فحيات الناس.
باش يتفادى هاد المشكل، اقترح ماسك فكرة نقل جزء من كمبيوترات للفضا باش تخدم بالطاقة الشمسية ب أقمار صناعية ، حسب كلامو الفضاء فيه طاقة شمسية دايمة، وهاد الشي يقدر يحرّر الذكاء الاصطناعي من القيود ديال الأرض ومشاكل البنية التحتية.
هاد المقترح خلق نقاش كبير وسط العلماء، حيث شي واحدين شافوه حل مبتكر، وشي آخرين حذّرو من مخاطر الزحام فالفضا ، اللي يقدر يهدد الأقمار الصناعية ويعقّد أي مهمة مستقبلية فالفضاء.
فالمقابل، خبراء فالطاقة كيقولو باللي الحل ما خاصوش يكون غير فالفضاء، ولكن حتى فالأرض، بتسريع الاستثمار فالطاقات المتجددة، وتحسين كفاءة مراكز البيانات، وبناء محطات طاقة نووية صغيرة باش تكفي الطلب المتزايد بلا ما ندخلو فأزمة عالمية.