كود الرباط//
جاوب وزير الشباب والثقافة والتواصل محمد المهدي بنسعيد على السؤال الكتابي اللي تقدم به الفريق الحركي بمجلس النواب، واللي تمحور حول “تأثير “تيك توك” على الصحة النفسية للأطفال وسبل الحماية”، وهضر كذلك شنو وجدات الدولة باش تواجه هاد المشكل.
الوزير قال فجوابو إن التحول الرقمي اللي عرفو العالم فالعشرين سنة الأخيرة، ومعاه الانتشار الكبير لوسائل التواصل الاجتماعي والتطبيقات الرقمية، خلق فضاء مفتوح فيه حرية التعبير، ولكن فيه حتى مخاطر حقيقية خصوصا على الأطفال والفئات العمرية الصغيرة.
وبحسب جواب الوزير، فرغم الفرص اللي كتمنحها هاد المنصات فمجال التعلم والتفاعل واكتساب المعرفة، إلا أنها ساهمت كذلك فبروز ظواهر سلبية، بحال انتشار المحتويات العنيفة، والانحرافات السلوكية، وخطابات الكراهية، والأخبار الزائفة، وحتى الإعلانات غير الملائمة لبعض الفئات العمرية، إضافة إلى تهديدات مرتبطة بالخصوصية الرقمية والاستغلال التجاري المفرط.
بنسعيد أكد أن الوزارة واعية بهاد التحولات، وكاتخدم دابا على إعداد مشروع قانون بمثابة “مدونة للاتصال السمعي البصري”، باش يواكب التطور التكنولوجي السريع، ويحقق توازن دقيق بين حماية حرية التعبير وحماية القيم المجتمعية، خاصة بالنسبة للأطفال والقاصرين.
المشروع، حسب الوزير، غادي يهم تنظيم المجال الرقمي بما فيه المنصات الرقمية ووسائل التواصل الاجتماعي، من خلال تحديد مسؤوليات واضحة على عاتق هاد المنصات، وتعزيز آليات التنظيم الذاتي والرقابة المؤسساتية. كما كيسعى يسد الفراغ التشريعي اللي كتستافد منو حاليا بعض المنصات الأجنبية اللي كتشتغل خارج نطاق الرقابة الوطنية.
الوزير شدد كذلك أن الهدف هو تعزيز السيادة الرقمية للمغرب، وضمان بيئة رقمية آمنة وشفافة وعادلة، تحمي الأطفال والشباب، وفنفس الوقت تحافظ على حرية التعبير.
الملف ديال تأثير تيك توك وباقي المنصات على الصحة النفسية ديال الدراري ولى موضوع نقاش واسع داخل البرلمان وخارجو، خصوصا مع تزايد حالات الإدمان الرقمي والمحتويات الخطيرة اللي كتوصل بسهولة لليد ديال القاصرين، فانتظار واش القانون المرتقب يقدر فعلا يدير توازن بين الحماية والحرية، ولا صعيب يتقنن مع التطور السريع للتطبيقات.