كود سبور//
حددت العصبة الوطنية لكرة القدم الاحترافية مواعيد ماتشات الدورات 13 و 14 و 15 من البطولة اللي غاديين يتلعبو فرمضان، وتاريخ الماتش المؤجل بين الرجاء الرياضي ونهضة بركان عن الدورة 6، واللي تقرر يتلعب يوم 25 فبراير، وتاريخ الكلاسيكو المؤجل بين الوداد والجيش الملكي عن الدورة 9، واللي تقرر يتلعب يوم الاربعاء 4 مارس.
وقرر العصبة الوطنية لكرة القدم الاحترافية، أن الماتشات كاملين ديال الدورات 13 و 14 و 15 يتلعبو مع 10 الليل، وغادي تبداو الدورة 13 يوم الجمعة 20 فبراير وتسالي يوم الاحد 22 فبراير، ومن اهم الماتشات اللي فيها الوداد الرياضي المتصدر ضد أولمبيك الدشيرة يوم السبت 21 فبراير فتيران اكادير، والرجاء الرياضي ضد اتحاد طنجة يوم الاحد 22 فبراير فستاد دونور.
والدورة 14 غاتلعب بين 27 فبراير وفاتح مارس، ومن اهم الماتشات اللي فيها القمة بين حسنية أكادير والرجاء الرياضي يوم الاحد 1 مارس فتيران اكادير الكبير وفنفس الوقت القمة بين الوداد الرياضي ونهضة بركان فستاد دونور.
اما الدورة 15 غادي تلعب بين 6 مارس 8 من نفس الشهر، واهم ماتشاتها الرجاء الرياضي ضد أولمبيك اسفي يوم السبت 7 مارس فستاد دونور، واتحاد التواركة ضد الوداد الرياضي الأحد 8 مارس فتيران المدينة (البريد).