ردو البال لولادكم.. دري صغير تصاب بحروق خايبة بسبب تحدي خطير على “تيك توك” (الصورة)

وكالات//

تصاب طفل عندو 9 سنين من ولاية إلينوي فأمريكا بحروق خطيرة من بعد ما حاول يدير واحد التحدي خطير مرتبط بلعبة حسّية معروفة. هاد الشي خلا الأطباء يعاودو يحذّرو من التحديات اللي كيدورو فالأنترنت ومن خطورة الحروق فالدار.

وحسب التفاصيل اللي نشرو مواقع محلية، تصاب كاليب تشابولا ملي حطّ لعبة فالمايكروويف. وهي عبارة عن مكعب مطاطي عامر بالجيل، كيتضغط باش ينقص التوتر، وماشي مخصّص يتسخّن. ولكن كاين واحد الترند فمواقع التواصل كيقول خاصها تتسخّن باش تولّي طرية أكثر. منين سخّنها كاليب، انفجرات وتناثر الجيل السخون على وجهو، وسبّب ليه حروق قوية.

ودّاتو مو لواحد السبيطار قرّيب لمدينة بلينفيلد فإلينوي، ومن بعد تحوّل لمركز الحروق فمستشفى لويولا الجامعي باش يتلقى علاج خاص. وگالو الأطباء باللي كان محظوظ، حيت رغم الانتفاخ الكبير فوجهُو، ما وقع حتى ضرر دائم فعينو، ودابا راه كيتشافى وماغاديش تبقى عندو آثار على المدى الطويل.

إقرأ الخبر من مصدره