گود سبور//
فرگع الكونگولي اوليفي سفاري رئيس لجنة الحكام فالاتحاد الافريقي لكرة القدم، قنبولة بخصوص فضيحة نهائي كاس افريقيا “المغرب2025″، اللي تلعب بين المنتخب الوطني المغربي والسنغال، وعرف شوهة كبيرة داروها السنغاليين، اللي انساحبو ورجعو كملو الماتش بلا حسيب ولا رقيب، وقدام رئيس الفيفا ورئيس الكاف والعالم كايتفرج.
وحسب موقع “وين وين” فالكونگولي اوليفي سفاري وخلال الاجتماع ديال اللجنة التنفيذية للاتحاد الافريقي بالعاصمة التنزانية دار السلام، اللي ترأسو اليوم الجمعة الجنوب افريقي باتريس موتسيبي، اعترف بلي طلبو من الحكم اللي لعب الماتش باش ما يعطيش الإنذارات الصفرا للاعبين المنتخب السنغالي بسبب الانسحابهم، وهذا الشي باش يقدر الماتش يكمل، وقال انه كان خاص الحكم يعطي لكل لاعب سنغالي صفرة على الانسحاب.
هذا الشي إلى كان صحيح راه مصيبة كحلة، خصوصا وان العالم شاف لاعبين السنغال كاملين خرجو من التيران بعدما اعلن الحكم على بينالتي لمصلحة المغرب، باستثناء الكابيتان ساديون ماني اللي مشى وصل عليهم للفيستيير ورجعهم يلعبو بعد توقف الماتش لأكثر من 13 دقيقة، وبلاما يعلق لهم الحكم ولا بطاقة صفرا واحدة.