كود – كازا //
مْن دون القنوات الإعلامية العمومية والعالمية , القنوات التلفزية المغربية فـمنصة “X” ما عندهاش اشتراك فخدمة X Premium لي كتخلص، وهاد الشي كيطرح بزاف ديال علامات الاستفهام على واش فعلاً مواكبين التحولات الرقمية لي واقعة فالعالم.
هاد المؤسسات الإعلامية الكبيرة بحال 2M وMedi1TV وSNRT News وArryadia خاصها تقوّي الحضور الرقمي ديالها بطريقة احترافية، خصوصاً فهاد لوقيتة ديال 2026 لي ولات فيها البادجات الرسمية ديال التوثيق وعلامات الاعتماد جزء أساسي من صورة المؤسسة والمصداقية ديالها قدّام الجمهور.
هنا كيخلّينا نطرحو سؤال حقيقي على أولويات الاستثمار وسط هاد المؤسسات ,واشنو لي خلاهم معطلين باش يتبنّاو معايير تواصل جديدة؟ حيث احترام الجمهور كيجي من تجديد أدوات الخدمة الرقمية وتطوير صورة المؤسسة فالمنصات العالمية، وماشي غير بالاكتفاء بالحضور العادي.
مجموعة من الفاعلين كيناديو بضرورة تجديد الإعلام الوطني باش يكون مواكب للمعايير الدولية، وكيعتابرو بلي هاد المؤسسات الوطنية خاصها تكون نموذج فالمهنية والاحترافية، ماشي غير حضور شكلي فالمنصات الرقمية،علما ان هاد الشركة عندها دعم عمومي وكتستافد من فلوس دافعي الضرائب والفاكتورات ديال ضو.
وبالنسبة للاشتراك ديال المؤسسات الإعلامية فـمنصة X، فهو كيخلّي الحساب يتوثّق بطريقة رسمية وكيعطيه البادج الذهبي (Gold check)، وكيبان للناس بلي الحساب رسمي وماشي مزوّر ,كيفما كيخلّي المؤسسة تربط الصحافيين والموظفين بالحساب الرئيسي، وكيعطي حماية أكثر ضد الحسابات المدرحة، وكيقوّي المصداقية ديال المؤسسات الكبيرة فالساحة الرقمية الدولية.