گود سبور//
نايضة فالرجاء الرياضي بسبب 4 اللاعبين ووكيل ديالهم خرقو الكونسونطراسيون ديال الفريق قبل ماتش الخضرا ضد يعقوب المنصور البارح الجمعة ضمن الدورة 12 من البطولة الاحترافية.
وعلم جورنال “گود” من مصادر رجاوية، ان 4 ديال اللاعبين خرجو من الكونسونطراسيون د الفريق ليلة الماتش ضد يعقوب المنصور، وتفاجأ بهم المسؤولين د النادي گالسين مع الوكيل ديالهم.
هذا الشي وحسب نفس المصادر يعتبر إخلال بالانضباط داخل الرجاء الرياضي، خصوصا وأن هاد اللاعبين مهمين والكونسونطراسيون قبل من الماتش مهمة بزاف، وغادي يتحالو بأربعة على اللجنة التأديبية د النادي وهذا الشي ما غاديش يدوز مرور الكرام، وراه المكتب المديري غير ميك حتى داز ماتش يعقوب المنصور على قبل مصلحة الفريق.
وخلق تعادل الرجاء الرياضي ضد يعقوب المنصور البارح الجمعة موجة غضب كبيرة من جماهير الخضرا على الفريق، خصوصا وان اللاعبين كان اغلبهم مستواهم متوسط بزاف وضعيف، ومن الفوق هذا التعادل جا من ورا خسارة الاحد اللي فات مع الكوديم.