كود – عثمان الشرقي//
قطاع ديال ’’أسواق التوقعات” فالإنترنت ولى طالع بزاف فهاد السنين الأخيرة، فين الناس كيراهنو على أحداث سياسية، عسكرية رياضية وحتى دينية، فمنصات بحال Polymarket وKalshi ،هاد الظاهرة تزادت تشهرات من بعد تقميرة كبيرة دارت قبل ما يتعتاقل الرئيس الفنزويلي Nicolás Maduro، وهاد الشي خلا بزاف يشكو واش شي ناس كان عندهم معلومات واستافدو منها باش يربحو فلوس كتار.
هاد المنصات كتقدم راسها بحال أسواق مالية خدامة بالكريبتو، اللي كيجيب فيها التوقع صحيح كيربح، مؤسس بوليماركت Shayne Coplan كيقول باللي الغرض هو “ينتج معلومات مفيدة‘‘، باش يكون الثمن كيعكس شحال الناس تايقين بلي غادي توقع شي حاجة، المخاوف تزادو كثر منين تبين باللي شخصيات سياسية عندها علاقة بهاد القطاع، ولد ترامب جونيور حتى هو خدام مستشار لهاد المنصات، وعائلتو استثمرات فيها .
دابا إلى شي نهار قرّرات Polymarket تدخل حتى الأحداث السياسية ديال المغرب فالرهانات ديالها، وتحط تقميرات فالبورصة ديال التوقعات بحال: شكون غادي يربح فالانتخابات 2026؟ شكون غادي يترأس الحكومة الجاية؟ لأشمن حزب غادي ينتاقل السيمّو؟ واش غادي يكون تعديل حكومي قبل ما يسالي العام؟ واش غادي يتبدّل الدستور؟ إمتى غادي يمشي إدريس لشكر؟ وشكون غادي يجي فبلاصة ابن كيران؟ فهاد الحالة غادي تولّي السياسة المغربية حتى هي سوق ديال التوقّعات، فين الناس كيتجمعو فالقهوة ويلعبو ويناقشو بالأفكار والأرقام الشي لي ممكن يطلع الوعي السياسي وطلع نسبة التصويت ويتشرك المواطن المغربي فالحياة السياسية.
الحاصول كيبقى المقال غير افتراضات تحليلية، وماشي دعوة.