البطولة: بنعسيد خرج لا تيتي لا حب لملوك فخسران فرقة حومتو مع الماص اللي خداو الصدارة مع الكوديم اللي ربحو اسفي

كود سبور//

مازال العبث فالتسيير الرياضي مستمر فأندية البطولة، فالوقت اللي خدامين فيه الجامعة الملكية المغربية لكرة القدم مع العصبة الوطنية الاحترافية، على الرفع من جودة تدبير الاندية، ولكن رئيس نادي بحال لوزير بنسعيد كايضربو ليك كلشي فالزيرو.

بنسعيد قرر يطبق نسبة 5% فماتش يعقوب المنصور على جمهور المغرب الفاسي ضمن الدورة 13 من البطولة الاحترافية مساء الجمعة فالتيران الاولمبي بالرباط، باش زعما يحرم الماص من قوتها اللي هي جمهورها، وجماهير المغرب الفاسي ما كانتش من العاگزين وقررت مقاطعة المباراة، والمصيبة ان يعقوب المنصور خسرو الماتش وضيعو مداخل مهمة كانو يقدرو يدخلوها من هذه المباراة، وبنسعيد خرج من الماتش لا تيتي لا حب لملوك.

الماتش سالا بنتيجة 2-1 لمصلحة المغرب الفاسي، الماص خداو 3 نقاط وولات عندهم 23 نقطة، وانفرد الفريق مؤقتا بالصدارة، اما يعقوب المنصور محتلين المركز 14 اللي كايلعب الباراج برصيد 7 نقاط.

وديما مع الدورة 13 من البطولة، قدرو النادي المكناسي يربحو اولمبيك اسفي فتيران مكناس، بنتيجة واحد لزيرو، وخداو 3 نقاط مهمة رفع بها الفريق الرصيد ديالو إلى 23 نقطة، وحتى هو تقاسم الصدارة مؤقتا مع المغرب الفاسي، اما اولمبيك اسفي محتلين المركز الاخير مؤقتا برصيد 5 نقاط.

إقرأ الخبر من مصدره