البطولة: الوداد رجعو للصدارة برباح كبير على التواركة.. ليفار طاحو فالتعادل مع التواركة والكوكب تعادلو مع الجديدة

كود سبور//

رجعو الوداد الرياضي لصدارة البطولة الاحترافية، بعدما حقق الفريق رباح كبير على اولمبيك الدشيرة مساء السبت فتيران اكادير الكبير ضمن الدورة 13.

وسالا الماتش بين الوداد الرياضي وأولمبيك الدشيرة بنتيجة 5 لزيرو لمصلحة الفريق الأحمر، وماركا اهداف الوداد كل من وسام بنيدر فالدقيقة 24، وليد الصبار فالدقيقة 35، ونور الدين امرابط فالدقيقة 47، وراميرو فاكا فالدقيقة 50 و 93.

الوداد الرياضي خداو بهذا الرباح 3 نقاط مهمة، خلات الفريق يرفع الرصيد ديالو مؤقتا إلى 23 نقطة، ويرجع لصدارة البطولة مؤقتا مع المغرب الفاسي والنادي المكناسي، مع 4 الماتشات مؤجلين عند الحمرا، اما أولمبيك الدشيرة بقات عندهم 15 نقطة ومحتلين المركز 7.

وديما مع الدورة 13 وفنفس التوقيت، طاح فريق الجيش الملكي فالتعادل مع المضيف ديالو اتحاد التواركة بنتيجة واحد لواحد، وقدر يماركي رضا سليم الهدف الاول للفريق العسكري من بينالتي فالدقيقة 59، قبل ما يماركيو التواركة التعادل بواسطة الدحماني فالدقيقة 74.

هذا التعادل ضيّع على الجيش الملكي 2 نقاط مهمين، وخداو غير نقطة واحدة رفع بها الفريق الرصيد ديالو إلى 19 نقطة ومحتلين المركز الخامس، أما اتحاد التواركة ولات عندهم 8 النقاط ومحتلين المركز 14.

اما الماتش الثالث اللي تلعب عن نفس الدورة ونفس التوقيت، سالا بين الكوكب المراكشي والدفاع الحسني الجديدي فمراكش بنتيجة التعادل السلبي زيرو لزيرو، وكل فريق منهم خدا نقطة واحدة، وولات عند الكوكب 10 النقاط ومحتلين المركز 10، والجديدة عندهم محتلين المركز 6 برصيد 17 نقطة.

إقرأ الخبر من مصدره