البطولة: الرجا رجعو للرباح بفوز على طنجة وطلعو للصدارة.. بركان ربحو الفتح

كود سبور//

رجعو الرجاء الرياضي للرباح بعد سلسلة من النتائج السلبية، وقدرو يربحو الضيوف ديالهم اتحاد طنجة اليوم الاحد فستاد دونور ضمن الدورة 13 من البطولة الاحترافية.

وسالا الماتش بين الرجاء الرياضي واتحاد طنجة بنتيجة 2 لزيرو لمصلحة الفريق الأخضر، وماركا هدف الرجا المدافع عبد الله خفيفي بالراس فالدقيقة 23، مع العلم أن اتحاد طنجة كملو الماتش ناقصين من الدقيقة 32، تطرد لهم بلال الودغيري، وكانوا الرجا يقدرو يخرجو رابحين بنتيجة كبر ولكن قلة التركيز داللاعبين الرجاويين قدام شبكة طنجاوا حرمتهم من أهداف أخرى، وبقاو بواحد لزيرو حتى اللحظات الأخيرة من الماتش فين قدر يحيى الگيز يقتل الماتش بهدف ثاني زوين.

وبهذه النتيجة خداو الرجاء الرياضي 3 نقاط مهمة خلاتهم يبقاو فصدارة البطولة مؤقتا برصيد 23 نقطة مع ماتش مؤجل، أما اتحاد طنجة بقاو فالمركز 11 برصيد 12 نقطة.

وديما مع ماتشات الدورة 13 اللي تلعبو فنفس هذا التوقيت، قدرو نهضة بركان يربحو الفتح الرياضي بنتيجة واحد لزيرو، ماركاه لهم بول باسيني فالدقيقة 69.

هذا الرباح خداو منو نهضة بركان 3 نقاط، رفع بها الفريق الرصيد ديالو إلى 17 نقطة، ومحتل مؤقتا المركز السادس مع 5 الماتشات مؤجلين، أما الفتح بقات عندهم 9 نقاط ومحتلين المركز 13 مع ماتش مؤجل.

اما ماتش نهضة الزمامرة وحسنية اكادير سالا بالتعادل السلبي زيرو لزيرو بين الفريقين، وكل واحد فيهم خدا نقطة واحدة، وبقاو الدكاليين فالمركز 10 برصيد 12 مع ماتش مؤجل، والسوسيين عندهم 15 نقطة ومحتلين المركز 9 مع ماتش مؤجل.

إقرأ الخبر من مصدره