گود سبور//
خرج الدفاع ديال البنت الفرنسية اللي كاتّهم الدولي المغرب اشرف حكيمي نجم باريس سان جرمان الفرنسي واحسن لاعب افريقيا لعام 2025، للرد على المعلومات اللي عطاها دفاع النجم المغربي بخصوص ان المشتكية عرقلت مسار التحقيقات وأنها كانت كاتخطط تنصب على اللاعب المغربي، ونفى هذا الشي واكد ان موقف المدعية قوي وصحيح.
وخلال حوار لها على قناة BFM الفرنسية، خرجت راشيل فلور باردو محامية المشتكية ضد اشرف حكيمي بعد احالة ملف اتهام اللاعب باغتصاب موكلتها على المحكمة ففرنسا وقالت: “رحبت الموكلة ديالي بهذا القرار وارتاحت له، ولكن واخا هذا الشي راه مازال كاتألم، ومؤلم بزاف تحمل 3 سنين من الإجراءات القانونية كطرف مدني فقضية اغتصاب، وهذا الشي صعيب بزاف، وعبء ثقيل على مرا انها تتقدم بشكاية اغتصاب ارتاكبو واحد الشخص عندو نفوذ بحال اشرف حكيمي، برافو على شجاعة الموكلة ديالي، اللي كانت هو ما تبززش عليها شي حاجة بلا رضاها وانا ما تضطرش تمشي لعند البوليس، ودابا ملي سالا هذا الشي راها مصممة تمشي فهاد القضية حتى تتحقق العدالة”.
وبخصوص داكشي اللي كشف عليه دفاع اشرف حكيمي على ان المدعية هضرت فميساجات مع شي صحبتها قبل ما توصل لدار النجم المغربي يوم 25 فبراير 2023، فيها خطة للنصب عليه ولا يشفروه، جاوبت محامية المدعية، وقالت: “ما غاديش نخلي دفاع اشرف حكيمي يشوهو موكلتي او يشهرو ولا يهينوها”.
وكملت محامية المدعية، وقالت: “من بين الرسائل اللي كاينين فالملف، كاين هذا الميساج “عفاك سربي راه اغتصبني”، هذا الشي اللي قالو الموكلة ديالي وهذا هو كلامها”.
وزادت محامية المدعية، وقالت: “دفاع اشرف حكيمي يصر على ادعاء ان موكلتي حاولت ابتزاز موكلهم فهاد القضية وأنها باغيا تسترزق وكاتقلب على الفلوس وهذا الشي ما منو والو، راه اللي باغي لفلوس ما كاينش لاش يمشي للمحكمة بتهمة الاغتصاب باش يدبر عليهم، راه ما كاين حتى شي رباح فهذا الشي وهادي حقيقة كاتطبق على كاع ضحايا الاغتصاب ففرنسا”.
واكدت محامية متّهِمة اشرف حكيمي بالاغتصاب، وقالت: “ما كاين حتى شي دليل ولو ضعيف يشير إلى اي محاولة ابتزاز او تهديد من طرف موكلتي، وباش نكونو واضحين راه ماشي غير أنا الوحيدة اللي كاتقول هذا الشي، راه من بين اللي اقتنعوا به المدعي العام وقاضي التحقيق، داكشي علاش باركا من الافتراء والكذوب، وحتى الادعاء ديال دفاع حكيمي بأن لائحة الاتهام الموجهة ضدو كاتستند غير لأقوال الموكلة ديالي وان القضية ضعيفة، راه ادعاء باطل، وملف القضية فيه مطالب مبررة للمقاضاة وأمر قضائي قوي.
وبخصوص محاولة المشتكية ضد اشرف حكيمي، عرقلة التحقيقات، وأنها ما بغاتش تعطي تيليفونها للبوليس، وما بغاتش الخضوع لفحوصات أمراض النساء ومواعيد وحدة الطب الشرعي، قالت المحامية ديالها: “باراكا من هذه الادعاءات والكذوب اللي منتشرين فكل بلاصة، هذا الشي ماشي بصح، وعكس ما كايقول دفاع اشرف حكيمي، راه الموكلة ديالي تعاونت بشكل كامل مع التحقيق، وادعاء دفاع أشرف حكيمي أن موكلتي عرقلت جميع خطوات التحقيق، هذا الشي عار نهائيا عن الصحة، وراه مشات لعند البوليس فنفس اليوم، وملي دازت عند المحققين قالت كانت مازال ما واجداش، وانها غادي تفكر فهذا الشي، وبغات تمشي بحالها فالبلاصة حيث كاتأمن ان واحد وحتى لاعب ما عندوش الحق يتعدى عليها وكايبان ليا ان جا الوقت باش يتقبلو الناس هذا الشي”.
وزادت اكدت محامية المتهِمة لاشرف حكيمي بالاغتصاب، وقالت: “شهادة موكلتي متناسقة ومفصلة على مدى 3 سنين، وهي مدعومة بأدلة كثيرة، منها ميساجات صيفطتهم لصحبتها، والتناقضات فأقوال أشرف حكيمي، وشهادة كيليان مبابي اللي كاتناقض أقوال أشرف حكيمي، وتسلسل زمني للأحداث ما فيهش اللبس، ولائحة الاتهام مبنية على أسس متينة”.