مزراوي طلعوه للعمارية فالنگليز بسبب واحد كايبيع ويشري فسينياتورات اللاعبين والحاج طلع قافز

گود سبور//

طلعو شي متتبعين فالنگليز الدولي المغربي نصير مزراوي لاعب مانشستر يونايتد العمارية ودارو عليه حملة انتقادات واسعة، حيث شد فواحد الشخص بغا ياخد التوقيع ديالو، قبل ما يتبين أنه كايبيع ويشري فالتوقيعات ديال اللاعبين وماشي معجب، وطلع الحاج المغربي قافز.

وكان خارج نصير مزراوي من تيران مانشستر يونايتد فالطوموبيل ووقفو عليه معجبين، واحد منهم عطاه يسني له، ولكن النجم المغربي وحسب شبكة “RMC” الفرنسية طلع قافز وعاق به، وهو يدير له جوج شرطات بالستيلو، وحسب نفس الشبكة تبين أن الشخص اللي كان باغي التوقيع ديال نصير مزراوي كايبيع ويشري فالتوقيعات التذكارية ديال اللاعبين.

الشبكة الفرنسية وضحت أن هاد الأشخاص ديما كاينشطو فبيع توقيعات اللاعبين، وأن هذا الشي كايقلق اللاعبين بحال نجوم البارصا اللي تشكاو من شي واحد ديما كايدير هاد الحرفة.

إقرأ الخبر من مصدره