كود سبور//
كشف الدولي المغربي سفيان أمرابط على تفاصيل الإصابة، اللي خلاتو ما يلعبش بزاف د الماتشات مع المنتخب الوطني المغربي فكأس إفريقيا 2025، والعملية اللي دارها مباشرة من ورا كوب دافريك.
وهضر سفيان أمرابط فحوار نشروه الفريق ديالو ريال بتيس الإسباني وقال: “كان وقت صعيب بزاف، حيث باغي نلعب ونعاون الفريق، شفت گاع الماتشات، وشحال من مرة الأمور ما كاتمشيش كيفما بغينا”.
وكمل أمرابط: “هذا الوقت علمني نصبر، وأن الجسم ديالك قادر يدير شي حوايج كثر من اللي كايبان ليك إلى التزمتي ببروگرام مزيان، وتدربت بالمعقول فالسيمانات اللي دازو و2 مرات فاليوم، وكانتمنى يجيب هذا الشي نتيجة فوقت قريب”.
وبخصوص صاحبو فريال بتيس، اسيكو اللي كان تصاطح هو وياه وتوعتو بجوج فواحد الماتش قبل اشهر، قال سفيان أمرابط: “كنت كانهضر معه كل يوم، كانت لحظة صعيبة بزاف علينا بجوج، كنت كانهضر معه ورا العملية اللي دار، ملي كنت فكاس افريقيا، وصيفطت ليه ميساج قلت له راني كانتسنى غير إمتى نرجعو نلعبو بجوج، وهو قاليا بلي غادي نرجعو نلعبو تاني، وكانتمنى له يرجع دغيا”.
وعلى المشاركة ديالو مع المنتخب المغربي فكوب دافريك، وضح أمرابط: “كاس إفريقيا كانت منظمة عندنا فبلادي، وحاولت نلعب فيها ودرت گاع اللي فجهدي، وكلشي شافني لعبت جوج ماتشات وكنت موعت وكانعاني، وما خلاونيش نلعب فالماتشات لاخرين، ومن ورا كاس إفريقيا درت عملية جراحية، ومن تماك وأنا خدام مزيان باش نرجع نلعب ونعاون الفريق، حيث توحشت الجمهور وما بقيتش قادر نتسنى كثر باش نرجع نلعب قدامهم تاني”.