كود سبور- كازا//
خسرو الوداد الرياضي أول ماتش لهم فالبطولة هذا الوسم، وضيعو فرصة الانفراد بالصدارة، بهزيمة فالكلاسيكو ضد الجيش الملكي فستاد دونور ضمن مؤجل الدورة 9.
وسالا الماتش بين الوداد الرياضي والجيش الملكي، مساء الأربعاء، بنتيجة 2 لواحد لمصلحة الفريق العسكري، واللي قدرو يماركيو هما اللولين بواسطة لاعب الوداد وليد الصبار اللي سجل على راسو فالدقيقة 19، وقدر حكيم زياش يماركي التعادل الحمرا فالدقيقة 28 بتسديدة صاروخية، قبل ما يماركي الهدف الثاني ديال ليفار يوسف الفحلي فالدقيقة 62.
وبهذه الخسارة ضيعو الوداد الرياضي فرصحة استرجاع الصدارة، وبقاو فالمركز الثاني برصيد 26 نقطة مع 3 الماتشات المؤجلين، أما الجيش الملكي طلعو للمركز الثالث وولات عندهم 25 نقطة مع 3 الماتشات مؤجلين.