كود سبور//
واخا الجامعة الملكية المغربية لكرة القدم، أعلنت رسميا تعيين محمد وهبي مدرب جديد للمنتخب الوطني المغربي فبلاصة وليد الركراكي اللي مشى البارح، وتم هاذ الشي فحفل البارح الخميس بمركب محمد السادس بالرباط، خرجت جريدة “ماركا” الإسبانية وقالت إن الاسباني تشافي هيرنانديز مازال غادي يدرب المنتخب المغربي.
وقالت “ماركا” إن المغاربة بغاو تشافي هيرنانديز يشد تدريب المنتخب الوطني المغربي فكأس العالم 2026، ولكن التوقيت ما كانش مناسب، وما كانش تشافي متحمس باش ياخد مشروع فنص الموسم وقبل بداية كاس العالم 2026، داكشي علاش اختارو محمد وهبي.
وكملت الجريدة الإسبانية وقالت، إنه واخا هذا الشي وبناء على شنو غادي يكون فكاس العالم يقدر يراجع المغرب النظر فتعيين تشافي، وهو مازال خيار مطروح.
“ماركا” هضرت حتى على الإسباني الآخر اندريس انييستا، وقالت إنه واخا الجامعة الملكية المغربية لكرة القدم، ما هضروش على هذا الشي، ولكن مازال الاسم ديالو مطروح كمرشح محتمل لمنصب المدير الرياضي للمنتخب المغربي.