كود – أزيلال //
عرف دوار أگنسو ن آيت ملال التابع لجماعة آيت بوولي بإقليم أزيلال لبارح الجمعة 6 مارس 2026، واقعة إنسانية صعيبة كتبيّن المعاناة ديال الساكنة مع العزلة فالمناطق الجبلية.
وحسب معطيات متطابقة ضطرّو سكان الدوار ينقلو مريض وهو مازال حي فوق الحمال، بعدما تقطعات الطرقان بسباب الثلج، وهاد الشي خلا الوصول للمنطقة صعيب بزاف.
عدد من رجال الدوار هزو المريض عل الكتاف لمسافة كتقارب 5 كيلومترات ودازو من طرقان صعاب وسط الحبل، ومن بعد هاد الرحلة الصعيبة، قدرات سيارة إسعاف توصل بصعوبة للمنطقة وسط الثلوج وتنقل المريض للمركز الصحي فآيت بوولي لي كيبعد ب 13 كيلومتر، قبل ما يمشي تاني ترونسفير للسبيطار الإقليمي فأزيلال لي بعيد تقريباً ب 78 كيلومتر.
هاد الواقعة رجعات للواجهة معاناة ساكنة المناطق الجبلية وغياب البنية التحتية الأساسية، كما فتحات باب التساؤلات على دور المسؤولين في فك العزلة على هاد الدواوير.
https://www.facebook.com/share/r/1DYPYDsab6/