محمد سقراط-كود///
أخنوش عطى نهار التنين عطلة للموظفين على أساس أنهم أصلا خدموا في شهر رمضان، راه رمضان كلو عطلة مدفوعة الاجر غير معترف بيها رسميا، وزيد عليها حتى نهار الجمعة راه الأغلبية خدام نص نهار العام كامل، العطل أصلا كثيرة في المغرب مقارنة بالمعدل العالمي، عاد زيد عليها التسهويك والسليت والتهركاويت، راه عرام ديال الموظفين لاينتجون شيئا غير مخلصين ومروجين الحركة وشادين كريديات ومحركين السوق ولكن حتى لين، قريبة لربعين مليون مغربي حاصلين في مية وخمسين مليار ناتج داخلي خام، بينما سويسرا بلا موارد طبيعية بلا بحر وغير تسعود دالمليون كينتجوا تقريبا ترليون في العام، بالنظام والعمالة التقنية الماهرة رالابتكارات والصناعات الدوائية والغذائية والصناعات الدقيقة.
المغرب راه خاصوا ينقص من العطل ويزيد في ساعات العمل ومن الكفائة ديال العمال باش يقدر ينافس، وطبعا هادشي يمشي مع قوانين وظروف عمل كتحتارم الشروط الإنسانية، راه حاليا البلاد غادا غير بالاستثمار ديال الدولة عوض يكون القطاع الخاص، المغرب تقريبا سبعين في المية من الاستثمار ديال القطاع العام، بينما في ماليزيا وهي دولة بحالنا كانت مستعمرة عندها جو خايب جات في آخر الدنيا ومسلمة وبنفس عدد السكان تقريبا، كتلقى القطاع الخاص هو لي كيحقق نفس الرقم ديال المغرب في الاستثمار تقريبا سبعين في المية، أغلب الدول الناجحة او لي دارت مسار تنموي محترم راه القطاع الخاص لي كيقود الاستثمار، حيت الهدف ديالو الربح وبمراقبة صارمة من الدولة غادي تحقق حتى النجاعة.
من المفروض خاص تبدى الخدمة نهار العيد لأن رمضان تقريبا كلو عطلة وحتى لي خدام كيدوزها تسهويك وقطعة وعصبية، وخاص حتى رمضان يتلغى ياك هو عبادة فردية علاش خاص تنظموا الدولة وتبدل توقيت العمل على ودو، تخلي الوقت العادي بحال العام كامل ولي بغا يصوم يصوم ولي بغا يامل ياكل شغلو هاداك، الدولة الحديثة ماشي دورها تنظم العبادات، دورها تحمي حق الناس في ممارسة او عدم ممارسة عبادتهم، أما باش البلاد كتسنى رمضان يكمل باش ترجع للخدمة والإنتاجية العادية، صدق اخنوش زاد نهار آخر عطلة راه بزاف، راه القرار المنطقي خاص يكون بمراجعة العطل في المغرب والتقليص منها ماشي الزيادة فيها.