كود – سبور //
من بعد القرار الأخير ديال لجنة الإستناف لي نصف المغرب بعدما اعتبر السنغال خاسرة بسباب انسحابها فالنهائي ضد المغرب فالكان الأخير ، رجعات فهاذ الأيام واحد القصة قديمة كتدور بزاف فالسوشل ميديا، كتقول باللي المنتخب المغربي انسحب و خرج من التيران فماتش ضد غينيا فـ1976 فكأس إفريقيا ،هاد الرواية انتشرات من بعد تصريحات إعلامية وبرامج تلفزية، ولكن بزاف ديال الناس بداو يتساءلو واش هاد الشي بصح ولا غير إشاعة.
حسب الأرشيف والتقارير ديال داك الوقت، ماكاين حتى دليل كيأكد هاد الهضرة، الماتش كان صعيب وسخون، وغينيا سجلات الهدف اللول، ولكن المغاربة ماخرجو حتى دقيقة من التيران، بالعكس الفريق كمل الماتش حتى لاخر، وخا أنهم كانوا لاعبين ناقصين بسباب حالة طرد .
فالدقائق الأخيرة، قدر المنتخب المغربي يرجع فالماتش ويسجل هدف التعادل، وهاد الهدف هو اللي خلاه يربح الكأس الإفريقية لأول مرة فالتاريخ ديالو ،يعني القصة الحقيقية مختلفة بزاف على اللي كيتروج دابا، واللي فيها بزاف ديال الفبركة والتبديل فالوقائع.
هاد الاشاعات دازت حتى فبرنامج سميتو “مقهى الرياضة” فـقناة فرانس 24، مني قال المذيع الكاميروني ريمي نغونو باللي المنتخب المغربي خرج من التيران فالماتش ضد غينيا عام 1976، ومن بعد رجع كمل اللعب.
من بعد هاد التصريح بداو فيديوات كينتشارو فالسوشل ميديا بشكل كبير، حتى خرجات وثيقة مزورة فيها شعار الاتحاد الإفريقي لكرة القدم كتأكد هاد الانسحاب، وانتشرات بزاف بين الناس، خصوصاً عند بعض المؤثرين اللي ساهمو فالترويج لهاد القصة ،ومع الوقت ولات هاد القصة كتكبر وتنتاشر أكثر، حتى ولات مذكورة فوسائل إعلام فرنسية معروفة بحال “ليكيب” وقناة فرانس 24.
