فاطنة لويزا – كود//
عارفة بلي هاد العنوان مستفز، ومغيقبلوهش صحابي وصحاباتي الكواشة، وممكن حتى مدير الموقع يبانليه فوت في الدوزاج ديال السخرية من واقع حزبي بئيس ديال كلاكلية اليسار، ولكن الغالب الله.
هاد الأسبوع بان واحد السيد سميتو العلمي الحروني، شخصيا معمري سمعت به، رغم اني كنظن زعما متبعة لليسار فبلادنا مزيان، وعندي علاقات حتى مع قيادات فيه.
هاد السيد قال بلي هو منسق شي تيار داخل الحزب الاشتراكي الموحد، سميتو تيار اليسار الجديد المتجدد.
شوف غير على سمية، تقول هربانة من شي مقرر ديال المطالعة في الثمانينات، او شي عنوان ديال شي موضوع في مدلة “المزمار” العراقية الموجهة للأطفال، لي كنا كنشريوها في الثمانينات بزود الدراهم، وحنا ديك الساعة أطفال صغار، مكنعرفو لا بعث عربي اشتراكي، ولا يسار، ولا اشتراكية.
أصلا هاد فكرة التيارات داخل حزب يساري مغربي مضحكة، جابها الساسي الله يسمح ليه، في إطار اليوتوبيات ديالو لي مكتساليش، وفي تقليد سوريالي لتقليد موجود في الحزب الاشتراكي الفرنسي، لي عدد المنخرطين فيه اكثر من عدد المنخرطين في الأحزاب المغربية كلها مجتمعة.
الساسي جاب هاد بدعة التيارات، في حزب يساري مغربي أصلا عدد المنخرطين فيه ما واصلش حتى 3 في المئة من أصغر تيار في الحزب الاشتراكي الفرنسي.
كاين عليه يعاود يتصنط لناس الغيوان: قلال قلال حنا، ما فينا ما يتقسم.
المهم نرجعو للعلمي الحروني، قلبت شوية، وسولت شي أصدقاء، ووصلت انه كان عضو في المكتب السياسي ديال الاشتراكي الموحد فاش كانت نبيلة منيب امينة عامة.
وانه كان ممثل داخل المكتب السياسي لتيار إسمه اليسار المواطن والمناصفة.
هاد التيار كان إسمه اليسار المواطن، ومن بعد زاد كلمة المناصفة، وولا اليسار المواطن والمناصفة، ودابا غسمو اليسار الجديد المتجدد.
حاجة واحدة نجح فيها، وهي يبدل الإسم ديال التيار، لي الأوراق لي قريت ليه كلها ما فيها حتى فكرة واحدة مقادة، او فيها شيإضافة، الهدرة لي كيقولوها هي نفسها لي كتقولها منيب، او العسري.
حاجة واحدة كيعاودوها هي الدعوة لتمثيلية نسائية داخل أجهزة الحزب، في حين معمر قاد هاد التيار يبين وجه نسائي واحد، من غير المرحومة غزلان بنعمر، ولي هربوه ليها، فخلات ليهوم التيار والحزب، وهربات الله يرحمها لعزلتها، من بعد ما بان ليها ما كاين لا يسار ولا مواطن ولا مناصفة.
هاد التيار لي كانو فيه، كيهربو بحالهوم، الوحيد لي كيبقا هو هاد العلمي الحروني، وكل مرة كيجيب شي ناس جداد ويبطقهم، باش يضمن يبقى عندو تيار، كيدير بيه شي ندوات فواحد المقر كاريه، ما يمكنش يهز حتى عشرة ديال الناس.
وفي الندوة الصحافية الأخيرة كان معه واحد السيد سميتو ربيع الكرعي، لي كان من زعماء الأساتذة المتعاقدين، وكان خوانجي، ومن بعد ولا استقلالي، شوية تلاقا مع الحروني وبغا يصحح مسار اليسار لي مكيقشع فيه والو، مهم كصايد وصافي.
العلمي الحروني غيتهم قيادة الاشتراكي الموحد بلي دارت فضائح.
أشنا هي هاد الفضائح؟
هي شي زوج شيكات تسرقو، ساويين شي 10 ديال المليون.
10 المليون سنتيم الأحزاب الكبيرة كتخسرها غير فنشاط واحد.
حزب كيقدم نفسو بديل، مضارب على 10 دالمليون سنتيم، وباغي يسير شؤؤون البلاد والميزانية.
قيادة الحزب طلعات مسطية كثار منو.
ردات عليه بلي معندهاش أصلا هاد التيار وبلي غتابعو قضائيا.
رحمة الله على زمان اليسار الحقيقي.
على الأقل قديما بوعبيد واليوسفي وعمر بنجلون ضاربو مع عبد الله إبراهيم والمحجوب بن الصديق.
وعبد الرحيم بوعبيد او اليازغي ضاربو مع عبد الرحمان بنعمرو. وأحمد بنجلون.
وبنسعيد أيت يدر ضارب مع عبد الله ساعف والمريني وعيسى الورديغي.
يعني حتى الانشقاقات والاتهامات بان هادا ما كيمثلش الحزب، كيكون بين أسماء كبيرة، وعلى أشياء كبيرة، حتى الصراع على الممتلكات كيكون على الجرائد او المطبعة او مقرات كبيرة.
ماشي صراع بين العسري والحروني وعلا 10 مليون سنتيم.
العسري قال بلي هاد 10 ديال المليون لقاو شكون خداها، وأنه رجعها وأن المجلس الوطني قرر يطوي الملف ويسامح الرفيق، وبلي الحروني كان ديك الساعة في قيادة الحزب ووافق على القرار.
الحروني جاوبو: لي شفر كان خاص نطردو مو.
هاكا بهاد الصيغة.
يا ودي يا اليسار الجديد المتجدد والمناصفة.
هادشي مضحك، وكيضر في الخاطر.
حزب يقوده شخص كيمشي للبنان لحضور لقاءات المسطيين ديال القوميين العرب، لي حتى فلبنان ما بقا حد كيديها فيهوم، وكيرجع للمغرب باش يقول لينا: ابلغكم تحايا رفاقكم من اليسار اللبناني القابض على الجمر، ويوجهون تحية خاصة لطنجة، فقط حيت هو طنجاوي.
وأمينته العامة السابقة والنائبة البرلمانية باسمه، كتقيل تروج في الخوبير ديال اليمين المتطرف بلا متعيق، خصوصا فداك الشي ديال المؤامرات، وكيسحابليها الاسكندر دوغين شيوعي، وكتنصح الرفاق يقراو ليه.
ولي كيقود تيار المعارضة فيه، واحد خارج يطرح مشكل ديال زوج شيكات دازت عليها شي عشر سنين دابا.
مع العلم ان هاد الحزب براسو فاش كان هو في المكتب السياسي مع منيب ضيع اكثر من 10 ديل المليون لي هي قيمة الدعم العمومي للأحزاب حيت فقط عطلو المؤتمر لمدة سنتين، هذا بلا مندويو انه في كل محطة انتخابية المجلس الأعلى للحسابات كيرفض الحسابات لي كيقدمها بخصوص مصاريف الحملة الانتخابية، رغم ان ديك الشي لي كيصرف هزيل جدا، ورغم ذلك ما كيعرفش يقاد الحسابات ديال زوج فرنك، وباغي يسير الحزب، وحتى هو كيقول: نحن البديل المنتظر.