كود -كازا //
بيّنات نتائج الدراسة الدولية للتعليم والتعلم 2024 (TALIS) بلي كاين واحد المشكل كبير ديال اللغة وسط الأقسام فالمؤسسات التعليمية فالمغرب، حيث تقريبا 70 فالمية من تلاميذ السلك الإعدادي كيلقاو صعوبة ففهم اللغة اللي كيتقراو بها، وزيد عليها أن 40 فالمية منهم كيقراو بلغة ماشي هي لغتهم الأم.
وحسب المعطيات اللي تْنشرات نهار الثلاثاء 24 مارس 2026، فسبعة من كل عشرة تلاميذ كيعانيو باش يستوعبو لغة الدروس، وأربعة من كل عشرة كيتابعو قرايتهم بلغة مختلفة على اللغة الأصلية ديالهم، هاد الشي كيبين أن مشكل اللغة ولى تحدي حقيقي وبنيوي فالتعليم فالمغرب، وكيأثر بشكل مباشر على جودة التعلم.
وفنفس السياق، وضّح ملخص التقرير أن المنظومة التعليمية فالمغرب فيها أساتذة صغار فالعمر ونشيطين، وكاين حضور كبير ديال النساء، خصوصاً فالتعليم الابتدائي، وهذا كيشكل رصيد بشري مهم. ولكن فالمقابل، كاينة مجموعة ديال المشاكل البنيوية اللي كتعطل الاستفادة الكاملة من هاد الإمكانيات.
كما جا فالتقرير أن نسبة العيالات فالتعليم الابتدائي كتوصل لـ64 فالمية، مقابل 46 فالمية فالتعليم الإعدادي، وهي نسب مازال أقل من المعدلات ديال الدول المشاركة فهاد الدراسة، وحتى أقل من المتوسط ديال دول منظمة التعاون والتنمية الاقتصادية اللي كيوصل لـ70 فالمية.