عمر المزين – كود////
كتستعد مدينة فاس، اليوم الجمعة، لاستقبال وفد من الاتحاد الدولي لكرة القدم (فيفا)، فزيارة تفقدية مهمة كتندرج ضمن تتبع الاستعدادات لتنظيم كأس العالم 2030، اللي المغرب مرشح يحتضنو بشراكة مع إسبانيا والبرتغال. هاد اللجنة حسب مصادر “كود” فيها 16 واحد.
هاد الزيارة اللي كتجي فمرحلة حساسة، غادي توقف على مدى تقدم الأشغال فعدد من المشاريع المرتبطة بالبنيات التحتية، سواء الملعب الكبير لفاس أو فضاءات التدريب والإيواء، واللي خاصها تكون فالمستوى ديال حدث عالمي بحال المونديال.
ولكن، فالمقابل، كتعيش المدينة وضع مقلق بزاف، خاصة مع الانتشار الكبير للكلاب الضالة فعدد من الأحياء والشوارع الرئيسية، إضافة إلى كثرة الحفّارات والأشغال المفتوحة اللي ولات كتشوه جمالية المدينة وكتطرح أكثر من علامة استفهام حول الجاهزية.
وحسب معطيات متطابقة، فالسلطات المحلية بتنسيق مع المقاطعات والجماعة، تحركت بشكل متأخر، حيث انطلقت تدخلات محدودة قبل أقل من 24 ساعة، خصوصا لمحاولة الحد من انتشار الكلاب الضالة فبعض المحاور الرئيسية، وزيد عليها ظاهرة الباعة الجائلين اللي كاينة في أهم شوارع فاس.
هاد التحركات كتبان غير كافية، حيث أن الظاهرة تفاقمت بشكل كبير خلال الفترة الأخيرة، وأصبحت معالجتها كتحتاج لوقت وإستراتيجية طويلة المدى، ماشي غير تدخلات ظرفية محدودة فالساعات الأخيرة. حقاش الوقت اللي كانت الناس كتغوت حتى شي حد مدار والو. ودبا الوضع خرج على السيطرة ديالو.
وفنفس السياق، كتزيد “الحفاري” المنتشرة فعدد من الشوارع الحيوية من حدة التخوف، خاصة وأنها كتأثر على السير والجولان وكتعطي صورة سلبية على المدينة أمام وفد دولي من حجم “فيفا”، بالإضافة إلى انتشار الشماكرية في مختلف شوارع فاس.
هاد الوضع كيثير تخوفات حقيقية من أن تقف لجنة “فيفا” خلال زيارتها على هاد الاختلالات، الشي اللي يقدر يطرح تساؤلات حول مدى جاهزية فاس لاحتضان تظاهرات رياضية عالمية، فواحد التوقيت اللي خاص فيه المدينة تبان بأفضل حلة.