كود – كازا //
غادي تعرض قاعات سينما ميغاراما فالمغرب فيلم الرسوم المتحركة “Allah n’est pas obligé” ابتداءً من اليوم السبت، هاد العمل السينمائي لقوي من إخراج ”زافين نجار“ ومقتبس من رواية الكاتب الإفريقي أحمدو كوروما.
الفيلم كيهضر على واحد من أخطر الظواهر فالحروب الإفريقية، ولي هي ظاهرة تجنيد الأطفال، الفيلم كيبين كيفاش دري صغير بحال بيراهيما كينقز من عالم البراءة وكيمشي يتحط فعالم السلاح وسط ميليشيات مسلحة، بلا تعليم وبلا حماية، وكيولي أداة فصراع ديال الكبار.
الأحداث كاتدور فـ ليبيريا فالتسعينات، فرحلة طفل كيهرب من التشرد مورا ما توفات مو فـكوديفوار، ولكن كيلقى راسو فوسط حرب معقدة كتجرّو باش يدخل فالميليشيا, الفيلم كيبين كيفاش العنف كيولي يومي، وكيفاش الدري كيعيش المعاناة عوض الطفولة.
بأسلوب بصري هارب ، الفيلم كيعكس التناقض بين البراءة ووحشية الحرب ، وكيطرح رسالة إنسانية قوية على ضياع الطفولة فلبلايص الگيرا، مع العنف السياسي والديكتاتوريات فإفريقيا.