كود – كازا //
المغرب قدر يجي اللول فـسوق تصدير اللوبيا الخضرا لأيرلندا فعام 2025، وهاد الشي كيبين باللي ولى واحد من كبار المصدّرين فالعالم.
وحسب معطيات منصة “إيست فروت” المختصة فتحليل البيانات الفلاحية، إيرلندا استوردات 817 طن من اللوبيا الخضرة المغربية فـ2025، يعني تزادت بـ2.5 مرات مقارنة مع 2024، وقريبة 7 مرات أكثر من 2023، وهاد الشي خلا المغرب يوصل لمستوى قياسي ويولي أول مورد لهاد السوق.
وقالت المنصة فواحد التقرير ديالها، بللي السوق الأيرلندي كيعتمد بزاف على الاستيراد وعندو شروط قاصحة فالجودة واللوجستيك، وفالسنين اللي دازو، كانت غواتيمالا هي لي كتسيطر على السوق، حيث كانت كتوفّر كثر من النص ديال الواردات بين 2019 و2024، ومعاها كينيا ونݣليز ،أما المغرب فكانت صادراتو محدودة وكتوصل غالباً بطريقة غير مباشرة من بريطانيا.
ولكن هاد الوضع تبدل من 2024، منين نقصات صادرات غواتيمالا بسبب مشاكل لوجستيكية فقناة بنما، وزيد عليها تشديد القوانين الأوروبية بخصوص ديشي المبيدات ،وهاد الشي خلا أيرلندا تقلب على مصادر جديدة، وتفتح الباب قدّام المغرب وكينيا باش يطلعو صادراتهم ديريكت، حتى إسبانيا وهولندا ولات عندهم دور فإعادة التصدير لهاد السوق.
وفـ2025، المغرب عرف كيفاش يستغل هاد الفرصة، ورفع الحصة ديالو لـ36.2% من مجموع واردات أيرلندا، وسبق كينيا والمملكة المتحدة.
وهاد الإنجاز كيبين حتى توجه أكبر، وهو أن المغرب كيقوي بلاصتو فأسواق الخضر والفواكه الطرية داخل الاتحاد الأوروبي، وكيترجع هاد النتيجة لعدة عوامل، بحال القرب الجغرافي، وتحسن سلاسل التوريد، وثمن تنافسي كيجعل المنتوج المغربي جذاب بالنسبة للمستوردين الأوروبيين.
وزيادة على هاد الشي، المغرب كان حقق حتى رقم قياسي فتصدر مطيشة لأيرلندا فالموسم اللي فات، وهاد الشي كيعطي إشارة واضحة باللي الحضور ديالو كيكبر فالتجارة ديال الخضر والفواكه فأوروبا.