گود سبور//
ما تقبلوش الاتحاد الإفريقي لكرة القدم، الفضيحة اللي دارو السنغال البارح السبت فستاد دو فرانس فالعاصمة الفرنسية باريس، ملي احتفلو بكأس إفريقيا 2025، قبل من الماتش الودي ديالهم ضد البيرو، واخا اللقب تسحب منهم من طرف لجنة الاستئناف للكاف اللي منحاتو للمغرب، بعدما اعتبرت أن السنغاليين خسرو الفينال بنتيجة 3-0، حيث انسحبو من النهائي.
وعلمت “گود” أنه كاينة حالة من الغضب داخل الاتحاد الإفريقي لكرة القدم، على الاتحاد السنغالي لكرة القدم، بسبب الحفل اللي داروه السنغاليين بكأس إفريقيا فباريس، واستياء كبير من الجهاز القاري تجاه هاد الخطوة وكاينين مسؤولين داخل الكاف اعتبرو أن هاد الفعلة اللي دارو الاتحاد السنغالي ما فيهاش احترام للاتحاد الإفريقي والأجهزة ديالو وحگروه هو والمكتب التنفيذي ديالو حيث ما احتارموش أجهزتو اللي من بينها لجنة الاستئناف اللي قضت بسحب اللقب من المنتخب السنغالي.
مسؤولين فالكاف كايشوفو احتفال السنغال بكأس أفريقيا اللي خسروه بقوة القانون، فيه تمرد على الاتحاد الإفريقي لكرة القدم، وقلة احترام له وفيه تحدي للقرارات ديالو واللجان اللي تابعين له، وما غاديش يدوزو هذا الشي للسنغاليين بشريبة ديال الما، حيث غادي تولي السيبا والسنغاليين ولاو نموذج دابا ديال التمرد على الجهاز القاري والقوانين ديالو، هاذ الشي من غير أنهم انساحبو من النهائي د كوب دافريك، وما احتارموش قرار الحكم بالإعلان عن ضربة جزاء للمنتخب المغربي.
للإشارة فكاين اجتماع اليوم الاحد فالعاصمة المصرية القاهرة، للمكتب التنفيذي للاتحاد الإفريقي لكرة القدم، برئاسة باتريس موتسيبي، وغادي ينافشو فيه مجموعة من النقاط، من بينها قرار لجنة الاستئناف باعتبار السنغال خاسرة أمام المغرب بنتيجة 3-0 فالفينال ديال كأس إفريقيا 2025، حيث السنغال انسحبو فالنهائي وبناء عليه سحب اللقب منهم ومنحو للمنتخب المغربي، إضافة إلى مناقشة الترتيبات للذهاب إلى محكمة التحكيم الرياضي الدولية للدفاع عن هذا القرار بعد الطعن اللي داروه السنغال عند الطاس.