محمد سقراط-كود///
أنا مواطن بسيط عايش على باب الله تزادت عليا جوج دراهم في المازوط والخضرة وكولشي بسباب جماعة إرهابية قررات تهجم على إسرائيل في سبعة أكتوبر وتسببت في سلسلة حروب تقدر ماتساليش ومع ذلك كاين في المغرب لي عند راسو كيخدم عقلوا وكيأيد هاداك الهجوم الإرهابي، ومن لفوق كيخون بلادو وأي واحد متعارض معاه، حتى استقرت الأوضاع والأمور غادا مزيان والمحروقات ناقصة في الثمن، وقائد العالم الحر سي ترامپ فرحان وكيوجد راسو لنوبل للسلام، نوض ياحماس وخراي في العجينة، دارو غزوة كتعطيها فكرة على كيفاش فتح عقبة بن نافع المغرب، وكيف فتح المغاربة نيت باقي البقاع والأراضي من جبال البيريني حتى لنهر السنغال، وطبعا راه وقع داكشي بنفس الطريقة قتل الرجال وسبي النساء، وداك الساعة بنادم مكانش ساوي لي خداوه كيبيعوه في سوق الغزل، دابا في حالة كان إسرائيلي او ميريكاني او من أي دولة عظمى راه كيطلبو الفدية وكيتساوموا بيه لتحقيق مطالب معينة.
أي انسان عاقل خاصو يدعي الله ينتاصر الجيش الامريكي دغية ويصفي النظام الإيراني باش ترجع الحياة لمجاريها ماشي العكس، أي مقاومة من النظام الديني الديكتاتوري الإيراني كتزيد غير تطول هاد الأزمة لي كتحول لعالمية نهار من ورا نهار، لدرجة الكسابة في المغرب طالبين الغلا في الحولي بسباب اغلاق مضيف هرمز، بحال الى كانت كتجي منو الفصة، وهادشي كامل وخاص تعتابر سبعة أكتوبر بطولة وشجاعة ماشي تطبيق فعلي للمثل العربي ديال جنت على قومها براقش، هاد براقش كلبة ديال واحد القبيلة هربانة مخبيين من قبيلة أخرى غازية وخلاتهم حتى قربوا وهي تبدى تنبح، شافوهم لخريين وقتلوا كولشي ومشاو ضحية لتهور كلبتهم براقش، ولحد الآن وبحساب عدد القتلى راه حماس حرفيا هي براقش.
السلام مايمكنش يتحقق والأطراف كلها مسلحة وقوية وقادرة تلحق الضرر بالطرف الآخر، خاص طرف واحد يسود ويتغلب ويسحق الأطراف الأخرى باش يتحقق السلام إلى حين، أو يكون توازن للرعب بين اطراف جميعها قوية، مكاينش شي نظام حاليا في العالم طالق جماعته وعروقه باش يفكر في معتقداته ويمول الثورات الدينية على الدول من غير نظام الفقها في إيران، والمغرب ضحية قديم لي هاد القضية راه من التمانينات والاخوان كيجربوا، باللاظافة الى اختراق الجالية المغربية بالتشيع والولاء للامام الفقيه، تخايل تخلي بني مكادة فيها غير الفقر والاجرام والمخدرات وترجع تلقاها عزادتها حتى السلفية والاخوان والشيعة والعدل والإحسان، راه ضرر مباشر كيلحق بينا كمغاربة وكيفرق بين النسيج المجتمعي، ومع ذلك بنادم مستاعد يعتابرهم ابطال غير حيت واخد النهار الامام قال أمريكا هي العدو الأكبر، بينما الواقع أمريكا رحمة للعالمين ومحررة العالم من كل الطغاة.