كود سعيد الشاوي ////
واقعة تخربيقة كبيرة فالصحافة فالمغرب وكلشي ساكت. من كورونا والحكومة كتخلص صاليرات الصحافيين لصحف ورقية والكترونية حتى اليوم وكلشي جاه هاد الشي عادي.
للتوضيح هاد الشي ما كتخلصوش الحكومة هاكاك. راه كاين قانون دعم المقاولات الصحافية. الحكومة فكورونا عوض ما تصرف هادوك لفلوس المخصصة للدعم للمقاولات قررات تعطيهم مباشرة للصحافيين. سالات كورونا ومازال هاد الشي حتى شهر مارس اللي فات.
لفضيحة ان لفلوس اللي تصرفو للصحافيين استافدو منهم ناس ما يستحقوهمش. كاين اللي دخل شركات ما عندها علاقة بالصحافة باش يتخلص فابور.
دابا خاص البرلمانيين يجرجرو وزير الاتصال محمد المهدي بنسعيد للبرلمان ولا ينشئو لجنة تقصي الحقائق. راه المال العمومي هادا. علاش كلشي ساكت.
خاص الحكومة تنشر فاطار الشفافية كل جورنال وشحال خدا. خاص الشفافية فهاد الموضوع. راه غاديين تكتاشفو فضايح كثيرة وكبيرة.
دابا ايلى زادت الوزارة شهورا خراين خاص شي حد يدعيها. حنا ف”كود” قررنا نرفضو نرسلو الوثائق من اليوم باش يخلصو صاليرات صحافيينا. باراكا من الشوهة.