محمد سقراط-كود///
كما الإمارات والشعب الإماراتي مدينين للدولة المغربية لمساعدتهم في تأسيس الدولة وركائزها، كذلك المغرب والشعب المغربي مدين للإمارات بالمواقف السياسية والمساعدات والشراكات والاستثمارات وبعلاقة حسنة مع هاد البلاد، لي كانت ولا زلت داعمة للقضية الوطنية الأولى، دعماتها من النهار اللول راه كل إمارة مثلها أمير في المسيرة الخضراء، مشاو جنبا الى جنب مع المغاربة لتحرير ماتبقى من هاد الوطن، ومع ذلك كتلقى المداويخ والكوفيين كيأججوا ضد الامارات وضد الخليج عموما، وواقفين ديما مع أي عدو أو دولة ضد بلادنا.
أكثر بلاد تستاهل يخرجوا المغاربة عن بكرة أبيهم يتضامنوا معاها ضد العدوان الإيراني هي الإمارات، بلاد صديقة وشريكة وماشفنا منها شعبا ودولة غير الخير، على عكس النظام الإيراني لي شفنا منو غير الشر، ولكن للأسف الكوفيين والمداويخ كي العادة بالنسبة ليهم المعارضة هي يكونوا ضد الدولة واخا يخليهم هاد الموقف يكونوا مع أعداء البلاد، هاعلاش وانطلاقا من منبر گود كنعلن على تأسيس الجبهة الشعبية لمساندة دولة الإمارات ضد العدوان الإيراني الغاشم، واللجان الالكترونية لي باغا تشوه هاد الدولة الصديقة، الدولة العربية المسلمة الوحيدة في العالم لي ناجحة وكينتلقلوا ليها الأوروبيين ومن العالم اللاول والحر باش يعيشوا فيها ويخدموا فيها كشباب، ماشي كشياب يجيو يتقاعدوا فيها.
وعلى خلاف أبواق قطر وباقي الدول، انا راه معندي علاقة بالامارات والا عنري مشيت ليها أو جات عندي، هادي غير كلمة الحق كنقولها وسلوك شاذ في المجتمع باغي نغيرو ونبه ليه، الانبطاح لأي نظام ضد الوطن غير من الباب المعارضة ليس من الشجاعة في شيئ، شوف كيفاش تقلبات الآية حتى ولات مناصرة أصدقاء الوطن خيانة وتبرديع، والوقوف جنبا لجنب مع أعداء الوطن شجاعة، ولكن للأسف الدولة عير سنين طلقات اللعب للخوانجية واليساريين أنهم يسمموا المجتمع بقضاياهم ويحرضوه ضد أصدقاء الوطن ويخليوه يشوف اعدائه كأبطال.