گود سبور//
شدو الكونگو الديمقراطية اللاعبين ديالهم وما خلاوهمش يمشيو للاندية اللي كايلعبو فيها، حتى تسالي الاحتفالات بالتأهل لكاس العالم 2026، اللي كايتعتبر تأهل تاريخي بالنسبة لهاد لبلاد بعد 52 عام من الغياب على المونديال.
ومن بين المتضررين من بقاء لاعبي الكونگو الديمقراطية مع منتخب بلادهم، نادي ليل الفرنسي اللي عندو هذا الويكاند ماتش مهم ضد لانس فديربي شمال فرنسا، وغايب عليه الكابيتان د الفريق، الكونگولي شانسيل مبيمبا، واللي مشى من المكسيك فين لعب باراج كوب ديموند ضد جاميكا الثلاثاء اللي فات إلى الكونگو الديمقراطية باش يحتفل بالتأهل التاريخي للمونديال ومازال ما رجع للتداريب ديال ليل، وراه كاين فالكونگو الديمقراطي حيث رئاسة جمهورية البلاد دايرين احتفال بهذا الحدث.
هذا الشي ما عجبش رئيس ليل الفرنسي، أوليفيي ليتانگ، واللي نقلت شبكة RMC الفرنسية تصريح له قال فيه ان القضية دابا عند لجنة الانضباط ديال الفيفا، وان الاتحاد الكونگولي لكرة القدم قرر من جانب واحد يمنع اللاعبين يمشيو لانديتهم حتى الاثنين الجاي، واخا قوانين الفيفا واضحين واللي كاتقول ان اللاعبين خاصهم يرجعو لانديتهم بعد 48 ساعة على الأكثر من ورا ماتش التوقف الدولي وان مبيمبا لاعب الكونگو الديمقراطية كان خاصو يكون مع الفريق ديالو ليل الخميس اللي فات فالعشية.