كود كازا ///
شحال من سيمانا هادي وشركة التواصل والعلاقات العامة “كوم اند تولك اجونسي” ولات مكلفة بالتواصل فحزب التجمع الوطني للاحرار. هاد الشركة تختارت بسباب مهنية صاحبها محمد بلفاس.
هي اللي غادية تكون مع حزب الحمامة فالانتخابات التشريعية لشهر شتنبر. “كود” كانت نشرات هادي كثر من عام باللي وكالة “پي ام ميديا” لفاطمة الزهراء اوتاغاني ما غادياش تاخذ التواصل ديال حزب لحمامة.
الغريب ان بلفاس كان خدام ف”پي ار ميديا” وكانت الباطرونا ديالها بغات ضحي بيه فالقضية الشهيرة ديال اتهامها باستهداف الامن ايام “كورونا”. للتاريخ الوكالة غير ظلمات وصافي ولكن عوض دافع على راسها ضحات ببلفاس اللي دار وكالة ديالو مع شريكات
اختيار “الاحرار” لهاد الوكالة ضربة ل”پي ار ميديا”. هاد الاخيرة كانت خدمات فانتخابات 2021 مع الاحرار وجابت غالبتهم ضعاف ما كيفهمو لا فالسياسة ولا فالتواصل. شهادات ل”كود” فضحات باللي شي خدمة داروها داخليا وتخلصات فيها “الوكالة” بحال قضية “ويكيبيديا”.
دابا هادي ضربة لوكالة غير خاص وزراء فالاحرار بحال الفلاحة وغيرها يبعدو منها. راه صحافيين مقاطعين المعرض الدولي للفلاحة بسبابهم.