گود سبور//
تواصل إسبانيا خسارة المعارك ديالها فحربها على العنصرية فالتيرانات، واخا المجهودات اللي دايرين مؤسسات الدولة تماك وبتعليمات من رئيس الوزراء الإسباني بيدرو سانشيز اللي خرج علانية واعلن قبل أيام إدانة العنصرية ضد المسلمين اللي صدرت من فئة ديال جمهور اسبانيا فماتش ودي ضد مصر.
وبعدما كانت العنصرية فالتيرانات الإسبانية كاتكون ضد الجماهير الأجنبية واللاعبين الأجانب بحال البرازيلي فينيسيوس نجم ريال مدريد اللي كان ضحية لها شحال من مرة، فهاد المرة العنصرية وصلت لمرحلة أخطر، والعنصريين فالصبليون ولاو هدفهم حتى اللاعبين الإسبان بسبب انتمائهم الديني او أصولهم اللي من خارج إسبانيا.
الضحية الجديدة هذه المرة هو الدولي الإسباني لامين يامال نجم البارصا والنجم الأول ديال منتخب الصبليون، واللي عايروه شي مشجعين ديال أتليتيكو مدريد فماتش بين الفريقين ضمن بطولة اسبانيا، ومن بين الحوايج اللي قالو له “الخايب، سير بحالك رجع للمغرب”، وهاذ الشي غير حيث خرج وأعلن إدانتو للعنصرية ضد المسلمين فالماتش بين اسبانيا ومصر، وقال بحكم أنه مسلم راه تضرر بسبب العنصرية ضد المسلمين فهاداك الماتش.
هذا الشي اللي كاتدوز منو اسبانيا من عنصرية، ما غاديش يكلفها الثمن غالي غير دابا، ولكن راه عندو خسائر على المدى الطويل، حيث العنصرية فالتيرانات الإسبانية ضد الأجانب او ضد الإسبان اللي من أصول أجنبية، غادي يأثر على حظوظ إسبانيا فمنافسة المغرب على استضافة نهائي مونديال 2030، حيث المغرب ما عندوش هذه العنصرية فالتيرانات، وبالإضافة لهاذ الشي راه غادي يخلي المواهب اللي عندها جنسية مزدوجة إسبانية-مغربية مثلا، تخاف تختار تلعب مع منتخب إسبانيا ويوقع لها بحال لامين يامال اللي فضل الصبليون على المغرب والمشاكل اللي طاح فيها، وولى كايتعرض للعنصرية واخا هو النجم الأول لمنتخب اسبانيا، وبالتالي فهاد المواهب الصغيرة غادي تولي تفضل منتخبات بلادها الأصلية بحال المغرب اللي فين غادي تلقى التقدير والاحترام، ويفرحو بها كيفما فرحو ببراهيم دياز نجم ريال مدريد اللي ولى بطل كبير فالمغرب وكلشي كايبغيه، وواخا ضيع بينالتي فالفينال ديال كأس إفريقيا 2025، فالمغاربة ما كانوش عنصريين معه، غير غضبو عليه فاللول ومن بعد تصالحو معه بحال أشرف حكيمي وحكيم زياش ملي زگلو بينالتيات مهمين حتى هما من قبل، وبقى عزيز عليهم، وهاذ الشي كامل حيث اختار يلعب مع المغرب بلاد باه.