احتفلات البعثة الدبلوماسية ديال السفارة الأمريكية بالمغرب، البارح فمدينة الدار البيضاء، بإغلاق المبنى التاريخي ديال “دار أمريكا” فحي غوتييه، فواحد الحفل اللي جمع عدد من الفاعلين والخريجين والمهتمين بالتبادل الثقافي.
وحسب معطيات توصلات بها “كود”، فإن هاد الخطوة كاتجي فإطار الانتقال نحو مقر جديد وعصري فايننس سيتي بكازا، واللي غادي يحتاضن نسخة جديدة من “دار أمريكا”، باش تواصل الدور ديالها فالتقريب بين الثقافتين المغربية والأمريكية.
وحسب ما نشرت الصفحة الرسمية ديال السفارة الأمريكية بالمغرب بفايسبوك ، فإن هاد الفضاء خدم لأكثر من 80 عام، وكان مركز مهم للتبادل الثقافي والتعليم والابتكار، واستافدو منو أجيال من المغاربة.
وأضافت نفس المصادر أن هاد المرحلة الجديدة كتتزامن مع احتفال البلدين بمرور 250 عام على العلاقات الثنائية، فإشارة لاستمرار الشراكة والتعاون بين المغرب والولايات المتحدة فالمستقبل