كود -الصويرة//
الطوايف اليهودية فالمغرب وفباقي دول العالم كيحتافلو بعيد ميمونة لي كيتصادف هاد العام مع نهار 9 و 10 أبريل.
عيد ميمونة هو واحد الاحتفال تقليدي ديال اليهود المغاربة، اللي مشا البلدان العالم، وولى دابا مناسبة رسمية فإسرائيل، كايحضرها رئيس الحكومة وكيبارك لليهود المغاربة، وكتدار الإحتافلات فالجرادي والساحات العمومية.
هاد العيد كيعتبروه اليهود مغربي مية فالمية، حيت بدا فالمغرب ومن بعد تشهر فالعالم كامل، وهو العيد الوحيد فالعالم اللي كانو فيه كيباركو المسلمين فالمغرب العيد اليهود ويحتافلو معهم ، حيث فـ“عيد الفصح” اليهود ما كيقدروش يدخلو الخبز وبعض الحوايج لديورهم، وهنا كانو المسلمين كيجيو ويجيبو ليهم الباروك.
وكيتعتابر “العشا د ميمونة” مناسبة مغربية، فين كيلتقاو فيها المسلمين واليهود، فآخر نهار ديال “عيد الفصح” وفهاد المناسبة، كيرجعو اليهود المغاربة ياكلو الخبز ومشتقاتو بعدما كانو حابسينو سيمانة كاملة ديال عيد الفصح. وكيوجدو طابلة عامرة بالحلويات لي من بينها “الموفليطا”.
الموفليطا” هي طبق يهودي مغربي بحال المسمن فالشكل وطريقة التحضير، ولكن ما كتتطواش على ربعة ، وكتتقدم غالباً للضياف مع اتاي ط ، وكيتقال “تربحو وتسعدو”. وكتبدا الأجواء ديال النشاط والموسيقى ما بين الحاضْرين.