كود – وكالات//
دراسة علمية جديدة ورات باللي الجدود ديالنا دازو من واحد الأزمة خطيرة بزاف، ما بين 813 ألف و930 ألف عام هادي، ملي هبط عدد الناس لـ1280 واحد فالعالم كامل.
هاد الأزمة بقات تقريباً 117 ألف عام، وهي مدة طويلة بزاف مقارنة مع عمر الحضارات البشرية كاملة، وفهاد الوقيتة السلالة ديالنا كانت قريبة بزاف للانقراض.
كيشوفو الباحثين باللي السبب فهاد الانهيار هو التغيّرات المناخية القاصحة لي ضربات الأرض فالعصر البليستوسيني، بحال موجات البرد فالعصور الجليدية، ونقص كبير فحرارة البحورة، والجفاف لي ضرب إفريقيا وأوراسيا، وهاد الشي كامل تسبب فخسران تقريباً 65% من التنوع الجيني ديال البشر فداك الوقت.
ولكن الغريب هو أن هاد الضغط الكبير ما قضاش على البشر، بالعكس خلا التطور يتحرك، ويخرج سلف مشترك جديد ديال إنسان هايدلبرغ، اللي منو تفرع من بعد الإنسان العاقل والنياندرتال والدينيسوفان، اللي هما بحال أولاد العم ديالنا واللي عاونات بقاياهم العلماء يفهمو تاريخنا القديم.