الطبيب النفسي ديال مارادونا :كان عندو اضطراب ثنائي القطب واضطراب الشخصية النرجسية والإدمان ديالو سبابو الخسران فالكورة

كود سبور //

فالمحاكمة ديال الطاقم الطبي لي منهم  بالإهمال اللي ممكن يكون تسبب فوفاة مارادونا، قال واحد الطبيب النفسي سميتو كارلوس دياز بلّي اللاعب الأرجنتيني كان كيعاني من الإدمان، وزيد عليها مشاكل نفسية بحال اضطراب ثنائي القطب واضطراب الشخصية النرجسية.

هاد التصريحات جات فمحكمة سان إيسيدرو حدا بوينس آيرس، فين كيتحاكمو سبعة ديال الناس من الطاقم الطبي (طبيب، طبيب نفسي، أخصائي نفسي وممرضين) على الدور ديالهم المحتمل فوفاة مارادونا عام 2020. ووضح دياز بلّي الحالة ديالو كانت معقدة، حيث كان كيعاني من ثلاثة أمراض مزمنة كيبقاو طول الحياة.

وزاد قال بلّي الإدمان ديالو كان مرتبط بالنجاح ديالو فالكورة، ومنين كان كيتعرض الخسارة ما كانش كيعرف كيفاش يتعامل معاها، وهو شخصياً ما تقابلش مع مارادونا حتى لشهر قبل ما يموت، ولكن لاحظ فيه رغبة حقيقية باش يتبدل ويحبس الإدمان.

حسب كلامو، الدور ديالو كان غير مساعدة مارادونا باش يوقف لالكول، وكيأكد بلّي هاد البرنامج نجح، وحتى التحاليل الطبية بينات بلّي ما كان حتى أثر ديال المخدرات ولا الكحول فدمو ملي مات.

ومن جهة أخرى، حتى فمحاكمة سابقة، طبيب شرعي أكد نفس الحاجة ،ما كان حتى أثر ديال المخدرات ولا الشراب وقت الوفاة.، دياز قال بلّي كاملين كانوا باغيين الخير لمارادونا، وأن الوفاة ديالو ما عطاتو حتى فائدة، بالعكس سببات ليه خسائر نفسية ومادية.

مارادونا، اللي ربح كأس العالم عام 1986، مات فـ25 نونبر 2020 فعمر 60 عام بسبب أزمة قلبية تنفسية وكان بوحدو فالدار ديالو فاش كان كيدوز فترة علاج بعد عملية بسيطة فالمخ، المتهمين كاملين كينكرو المسؤولية وكيقولو بلّي الوفاة كانت طبيعية، والمحاكمة ممكن تبقى حتى لشهر يوليوز، والعقوبات اللي كيتواجهو بها كتتراوح ما بين 8 و25 عام ديال الحبس.

إقرأ الخبر من مصدره