كود مصطفى الشاذلي ///
بالتزامن مع احداث العنف الخطيرة اللي وقعات فمركب مولاي عبد الله بالرباط بين محسوبين على جماهير الجيش والرجاء، كان مؤتمر للفيفا فكندا بحضور عضو اللجنة التنفيذية لهاد الجهاز فوزي لقجع اللي كيرأس الجامعة الملكية المغربية لكرة القدم. فيها عرفنا باللي المؤتمر الذي غادي ينتاخب رئيس الفيفا غادي يكون فالمغرب.
مع فوزي لقجع وصلنا لمستوى ما عمر شي رئيس داز فتاريخ الجامعة الملكية المغربية لكرة القدم وصلنا ليه. ولينا كنلعبو مع لكبار. كنافسوهم. شكون اللي كان يصدق باللي المغرب اللي انضم لمونديال 2030 مع اسبانيا والبرتغال ولى كينافس على احتضان الفينال بالملعب الكبير بالدار البيضاء.
شكون اللي كان يصدق باللي مؤتمر اختيار رئيس الفيفا يمكن شي نهار ينعاقد فالمغرب. شكون اللي كان غير يتصور شي نهار المغرب يحتاضن المقر الجهوي للفيفا.
مع فوزي المستحيل ماشي مغربي. بدل العقلية. ثقافتو اننا ممكن نديرو كلشي. ماشي بحال الاوربيين او صحاب اللعاقة لكثيرة فالعالم، بل بمستوى كثر منهم شي مرات وبطريقتنا المغربية، كيف وقع فتنظيم كأس افريقيا للامم الاخيرة. شفنا ملاعب تاريخية بحال كامب نو مع شوية الشتا ولات تقطر، وشفنا ملاعب مولاي الحسن والبريد ومولاي عبد الله واكادير وكازا وطنجة وفاس قاومو الشتا للي ما وقفاتش كثر من شهر.
مع كل المجهودات اللي كيدير هاد المغربي ولد المدرسة العمومية المغربية ولد الادارة المغربية، كاين رؤساء اندية ماشي غير كينزلو النيفو وصافي بل يقدرو يكونو سباب نتحرمو من فينال مونديال 2030.
احداث ماتش الجيش والراجا خايبة للملف المغربي. خايبة لصورة الكورة المغربية. بان باللي كاين مغرب غادي باكثر من ڤيتاس. لقجع شاد طريقو ومطلع النيفو ورئيس العصبة الاحترافية بلقشور ورؤساء اندية كثيرة منها الرجاء والجيش وحتى الوداد واخا قدم استقالتو، كيضربو هاد الدينامية. رؤساء كيخافو من الالتراس. كيخافو من الجمهور. ما كيخافوش على صورة لبلاد اللا غير على مصالحهم الضيقة.
خاص ماشي غير التغربيل. خاص محاسبة كل واحد دار تقصير وبتصرفاتو وقعات احداث عنف. شفنا اندية كدافع على العنف وكتبررو.
هاد الاحتقان راه بدا من فترة. ماشي بعيد غدا طيح شي روح او اكثر من روح. راه غاديين للحيط. خاص كلشي يتبدل فطريقة تسيير الاندية. التسيير تسيير والتشجيع تشجيع. رئيس نادي خاصو يكون مسؤول والا يتعرض للمحاسبة. مع كلشي اللي وقع ما شفناش المحاسبة. اللي قصر خاصو يخلص من رؤساء اندية وسلطات محلية وعصبة.
اللي كيوقع اليوم راه ماشي غادي يحرمنا من حظوظ تنظيم فينال مونديال 2030 وصافي، راه كيحرمنا حتى من ماتشات اكثر فهاداك المونديال. دابا خاصنا نختارو بين فوزي لقجع وبين رؤساء ولاو بيادق فيد فئة من الجمهور ماشي كاع الجمهور كولو