محمد سقراط-كود///
دابا نتا رجل وقاية مدنية دوزتي واحد من أصعب السطاجات ديال اللياقة البدنية، وخاصك جينيا تكون عندك مواصفات معينة باش تقبل أصلا، وكتاسبتي عدة مهارات للتعامل مع التدخلات المعقدة، ومهمتك في أصلها هي إنقاذ حياة الإنسان، هاعلاش راها من أكثر المهن احتراما في العالم، وفي اللخر تلقى راسك معيطين ليك باش تحل الباب على واحد مدخل وحدة في حي هامشي في تيفلت حتى الطريق معندو، وكذلك نتا بوليسي قاري ومدوز سطاج ولياقة بدنية عالية، وواليديك فرحوا ليك وعائلتك حيت تقبلتي في البوليس، وبقيتي كتقرى على راسك وترقى، باش في اللخر تلقى راسك نتا وطاشمة دالبوليس واقفين قبالت دار في زك تيفلت كتطبق القانون على واحد مدخل صاحبتو للدار، وجايبين سلوم وباغين يدخلوا ليه من الشرجم وجوج طوموبيلات ديال البوليس، والصحافة وأمر من وكيل الملك، هادشي كامل مخافة واحد أو وحدة يجيبو راس في هاد البلاد الطاهرة أرضها، واش ماشي هذا هو هدر الطاقات ديال بصح.
وكذلك نتا وكيل الملك من أكثر المهن احتراما في المغرب، معيطين ليك باش يعلموك على تدخل عاجل لجريمة كبيرة شناهي، واحد مدخل صاحبتو للدار، وغادي يوقفوا حداك وتدوزهم للمحاكمة وزيد عليها هيئة ديال القضاة قراو القانون حتى طابوا، ومحكمة على قدها خدامة باش يتعاقبوا جوج ديال الناس قرروا يعنقوا بعضياتهم أو يمصوا او يلحسوا أو يدومينيو أو غير ينعسوا مع بعضياتهم ويكتفيو غير بنعسة الواليدين، ومن بعد يشعلوا گارو ويانقشوا السياسة وتأثير إغلاق مضيق هرمز على توفر العازل الطبي في الأسواق، ومن بعد غادي تخدم معاهم إدارة السجون وإعادة الإدماج، وتشوف واش تعاقبوا وتابوا، يعني شنو العبرة لي خاص يفهموا هاد الكوبل من هاد المتابعة وهاد التدخل والطريقة باش تشدوا، أن أفضل حل في هاد البلاد هو يكون الواحد مخصي والمرة من الاحسن ماتكونش گاع ونهنيو السوق.
واش ماشي عار علينا كبلاد وشعب ودولة ومشرعين، أنه باقي كاين تدخلات أمنية ومتابعات قضائية من هاد النوع وموثقة بالفيديو، طاشمة ديال رجال الأمن والوقاية المدنية والپينسا والسلوم والمفاوضات بحال إلى محتاجز رهينة، راه خاص يتوقف هاد العبث راه كيجمعنا غير مع الدول المتخلفة الغارقة في المشاكل، هانتا قلب على لائحة ديال الدول لي كتعاقب على ممارسة الحب خارج الزواج، غادي تلقى السودان أفغاتستان سوريا وباقي الدول لي كيهربوا منها الناس يوميا وكيمشيو يطلبوا اللجوء للدول لي مكتعاقبش على ممارسة الجنس خارج إطار الزواج، واش هادي هي الصورة والحالة لي باغين نبقاو فيها بينما الدول في العالم غادا مكسيريا في الحريات والاقتصاد والتقدم وكولشي.