أميمة عطية – كود كازا ///
نشر لفنان رشيد الوالي، هاد صباح ليوم الجمعة، خبر وفاة عميد الأغنية المغربية عبد الوهاب الدكالي ف حسابو فـ”فيسبوك”، وكان من سباقين اللي علنو لخبر قبل ما يرجع ويحذف التدوينة، فخطوة خلات بزاف ديال المتابعين يتساءلو على حقيقة الوفاة، قبل ما يتأكد الخبر بشكل رسمي وسط حالة حزن كبيرة فالساحة الفنية المغربية.
وفهاد السياق، تواصلات “كود” مع الفنان رشيد الوالي، اللي عبر فتصريح خاص ب ” كود” ، على الحزن الكبير ديالو بعد رحيل واحد من أعمدة الفن المغربي، مؤكدا باللي الساحة الفنية فقدات اسماً استثنائياً بصم تاريخ الأغنية المغربية والعربية لعقود طويلة.
وكال الوالي: “عبد الوهاب الدكالي ما كانش غير مطرب، كان فنان شامل وقامة فنية كبيرة، عطى بزاف للفن المغربي وخلا بصمة عمرها ما غادي تمحى”.
وزاد ضاف باللي الأجيال لجديدة كتعرف الدكالي أساساً كصوت خالد صنع أجمل الأغاني المغربية، لكن قلة اللي كيعرفو أن الراحل كان حتى عاشقاً للصورة والسينما والمسرح، وأن الحضور الفني ديالو تجاوز بزاف حدود الأغنية.
ووضح، الوالي أن الدكالي ما كانش غير فنان كيطلع للخشبة ويغني، بل كان فنان شامل شارك فأعمال سينمائية بحال “الحياة كفاح” و“أين تخبئون الشمس” و“رمال من ذهب”، واشتغل حتى فالموسيقى التصويرية والمسرح، فواحد الفترة اللي كان فيها الفنان المغربي كيكافح باش يثبت راسو عربياً وسط منافسة قوية.
وأكد الوالي أن أكثر حاجة كانت كتميز عبد الوهاب الدكالي، هي أنه فهم بكري باللي الفن ماشي غير صوت، بل إحساس وصورة وحضور وثقافة كاملة، وحتى الطريقة اللي كان كيقدم بها الأغنية والتصوير ديالها كانت سابقة للعصر ديالها.
وأضاف: “هاد الجيل ربما ما عاشش داك الزمن، ولكن مهم يعرف أن أسماء بحال عبد الوهاب الدكالي ما صنعتش غير أغاني ناجحة، بل ساهمات فبناء صورة الفن المغربي عربياً، وخلاو الجمهور فالمشرق والخليج يردد الأغنية المغربية بمحبة واحترام”.
مترحماً عليه بالقول: “الله يرحمو ويوسع عليه، وغادي يبقى خالد بأعمالو ومسيرتو الكبيرة”