گود سبور//
كاتواصل المناوشات ديال الديربي بين الصفحات الرسمية د الوداد والرجا، واخا الماتش راه سالا وصافي اللي ربح ربح واللي خسر راه خسر.
اليوم الاحد فالصباح، حطات الصفحة الرسمية ديال الوداد الرياضي فيديو ديال واحد مشى لصق منشور مكتوبه فيها “كازا حمرا” على الباب ديال مركز تداريب الرجاء الرياضي فالوازيس.
هذا الشي غادي يزيد فتأزيم المشكل بين الناديين ويخلف توتر بين الجماهير، فكازا وفالمدن الاخرى اللي فيها جماهير الفريقين.
للإشارة فالبارح الرجا والوداد جاتهم تعليمات من السلطات باش يوقفو الكلاشات اللي كانو بيناتهم قبل الديربي واللي وصلو حتى للعنصرية والتمييز، ومسحوهم، ودابا هاد التصرف الصادر من الصفحة الرسمية د الوداد غادي يشعل شي فتيلة ديال المشاكل حتى حد ما عارف عواقبها، خصوصا وأن الملاعب كاتدوز من أزمة شغب، وخاص الأندية يكونو مساهمين فمحاربتها ماشي يزيدو يشعلوها.