كود سلا///
عرف المركز الثقافي تابريكت بمدينة سلا، مساء الخميس 14 ماي 2026، تنظيم واحد السهرة الثقافية اللي دازت فجو ديال النقاش والفكر، واللي تخصصات للاحتفاء برواية اللاروب ديال الكاتب حسن أوريد، وذلك ضمن أنشطة “المقهى الثقافي” اللي كتنظمها المنظمة المغربية المدرسية، بحضور عدد من المهتمين بالثقافة والأدب.
السهرة تميزات حتى بتكريم الأستاذ نور الدين اقشاني، رئيس شبكة المقاهي الثقافية بالمغرب، اعترافاً بالمجهودات اللي كيديرها فالمجال الثقافي والعمل المدني، خصوصاً فإحياء دور المقاهي الثقافية كفضاءات للنقاش والحوار والإبداع.
أشرف رابولي، نائب رئيس المنظمة المغربية المدرسية، قال فكلمة بالمناسبة بلّي تكريم اقشاني ماشي غير احتفاء بشخص، ولكن حتى بالقيم ديال الثقافة والحوار والعمل المدني، منوها بالدور اللي كتلعبو شبكة المقاهي الثقافية فقرب الثقافة من المواطنين وخلق فضاءات مفتوحة للنقاش الحر.
وأضاف رابولي بلّي تجربة المقاهي الثقافية رجعات للمقهى الدور ديالو الثقافي، كفضاء للقراءة والشعر والفكر والفن، مؤكداً أن هاد المبادرات ولات ضرورية فظل التحولات الاجتماعية والتوتر اللي ولى حاضر فالعلاقات الإنسانية والخطاب العمومي.
المتحدث اعتبر حتى أن نور الدين اقشاني كيعطي نموذج للفاعل الثقافي اللي كيشوف الثقافة ضرورة ماشي غير ترف، حيث عندها دور فبناء الإنسان ونشر قيم الانفتاح والحوار، مضيفاً أن تجربة المقاهي الثقافية بينات بلّي العمل الثقافي الجاد يقدر ينجح حتى بإمكانيات بسيطة وإرادة حقيقية.
اللقاء عرف كذلك نقاش مفتوح حول رواية “اللاروب”، فين تفاعلو الحاضرين مع المواضيع والأسئلة الفكرية والإنسانية اللي كتطرحها الرواية، وسط أجواء طبعاتها روح الحوار والانفتاح.
وفالختام، تم تقديم شهادات تقديرية وكلمات شكر فحق نور الدين اقشاني، وسط إشادة كبيرة بالمسار ديالو ودورو فخدمة الثقافة والعمل المدني فالمغرب.