محمد سقراط-كود///
مكاينش شي إنسان في العالم تعتبر اللغة العربية عي لوغتو الأم، هادي حالة كتميز عربية على باقي اللغات وكون ممانتش لغة الدين والمنابر كون ماتت، علما ان العربية الحالية هي لغة حديثة ومحسنة ومبسطة ومعندها علاقة بالعربية القديمة، دابا نيت تقدر تلقى طالب جامعي ديال العربية وميفهمش الشعر ديال تأبط شرا أو الشنفرى أو أي شعر جاهلي وحتى في فترة الإسلام، راه غير الكتب الفقهية ديال داك مكتوبة بلغة مبدلة على العربية الحالية، راه في السعودية واليمن وكيتعلموا العربية كلغة تانية في المدرسة، وكتجي للمغرب وكتلقى واحد ماتعلم يقرى فقرة بالعربية حتى وصل للاعدادي ومع ذلك كيعتابر العربية لغته الأم وكيفتاخر بيها وباغي يفرضها على المغاربة لخريين.
واحد المرة جربت ندوي بالعربية الفصحى في السعودية وبنت بحال الى خارج من شي رسوم متحركة ديال التمانينات، والطرف الآخر حتى هو سعودي زعمة من بلاد العربية، ومع ذلك كان كيجاوبني بلهجتو المحلية مخلطة بالانجليزية، ولقيت ان لونگلي هي لغة التواصل أصلا تم، بحكم ان الناس من جنسيات مختلفة وكلها ولوغتو الأم، العربية لغة البلايك والتلفازة نوعا ما، اما اللهجات المحلية ولونكلي هي لغة الواقع، كذلك في أي بلاد تعتبر راسها عربية تمشي ليها، راه تاحد ماغادي يهدر معاك بالعربية الفصحى مكاين غير اللهجات والعامية مخلطين مع العربية نيت ولغات أخرى، وخصوصا الخليج راه لونگلي عندهم منطوقة كثر من العربية الفصحى.
لونگلي الى تعلمتيها يمكن تمشي لأي قنت في العالم وتهدر بهاديك اللغة لي تعلمتي ويفهموك وتواصل مع الناس، بينما العربية حدك شي مدرسة ديال التعليم العتيق وشوف تشوف، وطبعا انا معنديش معاها موشكيل كلغة بل العكس كنبغيها وعي لغتي الوحيدة لي متمكن منها وكنقرى ونكتب بيها، عندي موشكيل فاش كتحول اللغة لهوية، الهندي كيهدر بلونگلي كيبقى يعتابر راسو هيندي، والمغربي لي كيهدر بالفرونسي كيبقى مغربي، ولكن غير حيت كيهدر بالدارجة ماشي حتى بالعربية كيولي يعتابر راسو عربي قحطاني من بني عبس، العربية راه لغة مستعمر بحالها بحال الفرنسية والاسبانية ويمكن اعتبارها غنيمة من غنائم الاستعمار، ولكن ماخاصش تولي هوية.