كود – وكالات //
عرفات مدينة Florence فـإيطاليا واحد الحادث خطير قدّام المحكمة، بعدما حاولات مهاجرة مغربية زيادة 1979 تشعل العافية فراسها وسط الشارع، فمشهد صدم الناس اللي كانو تما، السيدة حسب مصادر محلية، كان عندها ضغوط نفسية ومشاكل قانونية وإدارية خلاتها توصل لحالة ديال اليأس الكبير.
https://www.facebook.com/share/r/1BE6c5ksjr/
الواقعة وقعات فمحيط المحكمة هاد اليومين مني المرا بدات كدير حركات خطيرة وكتوجد باش تحرق راسها، قبل ما يتدخلو عناصر الكارابينيري والحماية المدنية دغيا . التدخل الأمني جا فآخر لحظة، وقدرو يسيطرو على الوضع قبل ما توقع الكارثة، وسط حالة ديال الخوف والصدمة بين المواطنين.
المهاجرة المغربية تنقلات ديريكت للسبيطار باش تخضع للفحوصات الطبية والنفسية، خصوصا أنها كانت فحالة انهيار عصبي، ووفق المعطيات المتوفرة، السلطات الإيطالية ما تعاملاتش مع القضية غير من الجانب الأمني، بل حتى من الجانب الإنساني، حيث حاولو يفهمو الأسباب اللي دفعاتها توصل لهاد المرحلة الخطيرة.
من جهتها، فتحات السلطات القضائية الإيطالية تحقيق رسمي تحت إشراف المدعي العام بمدينة فلورنسا، باش يعرفو جميع الملابسات المرتبطة بالحادث، والأسباب الحقيقية اللي خلات السيدة تختار المحكمة كلاصة لمحاولة الانتحار، التحقيق غادي يركز كذلك على الظروف الاجتماعية والقانونية اللي كانت كدوز منها، وإلى كانت بعض التعقيدات الإدارية ساهمات فدفعها لليأس.
الحادث خلا تفاعل كبير وسط الجالية المغربية فـإيطاليا، خصوصا مع تزايد الضغوط النفسية والاجتماعية اللي كيعيشها بعض المهاجرين لرا بلادهم، وسط مشاكل الإقامة والخدمة والاستقرار.