كود – وكالات //
عاشت مدينة مودينا الطاليانية عشية البارح السبت، واحد الحادث خطير بعدما دخل مهاجر مغربي عندو 31 عام بطوموبيلتو وسط تجمع ديال المواطنين والسياح بسرعة كبيرة، وخلا وراه 8 مجروحين، التحقيقات مازال خدامة باش يعرفو اشنو وقع بالضبط.
الحادث وقع تقريباً مع الربعة ونص ديال العشية، ملي السيد كان غادي بطموبيل “سيتروين C3” بسرعة كتفوت لـ100 كيلومتر فالساعة فشارع “فيا إيميليا” وسط مودينا، مني ضرب فلول واحد الراجل كان سايق بيكالة، ومن بعد طلع للطروطوار ودخل وسط الناس بالجهد، حتى طارو بعض الضحايا فالسما من قوة الضربة. ومن بعد كمل الطريق ديالو للطريطوار لاخر وحاول يبغج ناس آخرين لي فلتو بصعوبة، قبل ما تسالي الرحلة ديالو بعدما ضرب فالواجهة الزجاجية ديال واحد المحل التجاري، وفهاد اللحظة لصقات سيدة بين طوموبيل ومحل وتقطعو ليها رجليها بجوج.
وحسب آخر المعطيات من السبيطارات، كاينة مرا عندها 69 عام حالتها خطيرة ولكن مستقرة، ومرا أخرى عندها 53 عام دازت من بزاف ديال العمليات ومازال حالتها صعيبة، وراجل طالياني عندو 55 عام تحت المراقبة الطبية و3 ديال الناس قدرو يخرجو من السبيطار من بينهم بنت عندها 22 عام تضربات فالرأس، وراجل شدو كريز بالخلعة ؤ ورجل اخر تجرح بضربة ديال الموس مني بغا يشدو.
المجرم سميتو “سالم الكودري”، تزاد ف 1995 فمنطقة سيريات بإقليم برغامو، وكيعيش بوحدو فبلدة رافارينو القريبة من مودينا، عندو شهادة فالاقتصاد ومخدامش، والناس لي عرفوه قالو باللي كان داخل سوق راسو، وحتى فالحساب ديالو فـ”إنستغرام” كان كاتب: “كنتمنى نقدر نفهم قواعد تصرفات البشر كيفما كنقدر نفهم حروف اللغة العربية.”!
وكشفات التحقيقات باللي خدمات الصحة النفسية فـ”كاستيلفرانكو إيميليا” كانت كاتابعو بين 2022 و2024 بسبب اضطراب فالشخصية من النوع الفصامي، قبل ما يقطع التواصل معاهم، وفجلسة الاستماع لي دازت نهار الأحد، رفض يهضر مع المحققين واستعمل حقو فالسكات، المختصين فالطب النفسي قالو باللي يقدر يكون وقف الدوا ديالو، الشي لي خلاه يدخل فأوهام وأفكار اضطهادية دفعوه يدير هاد الهجوم.
https://x.com/i/status/2055726728161415667
ومن بعد الحادث حاول يهرب على رجليه، وهاجم واحد المواطن بموس ملي حاول يوقفو، ولكن مجموعة ديال الناس قدرو يشلو الحركة ديالو ويسلموه للبوليس، عمدة مودينا دعا الناس ما يستغلوش الواقعة سياسياً ضد المهاجرين.
الرئيس الطالياني Sergio Mattarella ورئيسة الحكومة Giorgia Meloni مشاو نهار الأحد لمدينة مودينا وبولونيا باش يشوفو المصابين ويعبرو على التضامن ديالهم، وحتى تلاقاو بالمواطنين لي ساهمو فتوقيف الجاني، وصفات ميلوني المواطن “لوكا سينيوريلي” بالبطل بسبب تدخلو لإيقاف المهاجم رغم الخطر.