كود سبور//
كتوجد إسبانيا بقوة لكأس العالم ديال السباحة الفنية اللي غادي يتدار فمدينة بونتيفيدرا ما بين 29 و31 ماي، وهاد المرة الفريق الإسباني جاي بروتين جديد ومختلف باغي به يرجع يسيطر على هاد الرياضة عالمياً.
المدربة أندريا فوينتيس قررات تبدل الرقصة الشهيرة “أبراكادابرا” اللي كانت على أنغام ليدي غاغا، ووجدات عرض بهلواني جديد جاي من أغنية “بيرغهاين” ديال الفنانة الإسبانية العالمية روساليا.
𝐁𝐄𝐑𝐆𝐇𝐀𝐈𝐍 – Equipo de natación artística español & Rosalía
La maravillosa rutina acrobática que verá la luz en la World Cup de Pontevedra
Una producción de @rfen_oficial y @SuportFilms pic.twitter.com/G4FOUZKeTk
— RFEN (@RFEN_Oficial) May 18, 2026
الفيديو اللي نشراتو الجامعة الإسبانية للسباحة بان فيه أن الستيل الجديد فيه حركات صعيبة بزاف وتقنيات معقدة أكثر من اللي كانو كيديرو فالبطولات السابقة، وهادشي يقدر يعطي لإسبانيا أعلى تنقيط فالتاريخ إلا قدر الفريق ينفذ العرض بلا أخطاء.
ومن بعد الميدالية البرونزية اللي ربحاتها إسبانيا فبطولة العالم 2025 بسنغافورة، الطموح دابا هو تفوت الصين، اللي ولات كتسيطر على السباحة الفنية وربحات اللقب العالمي 4 مرات متابعة. المدربة فوينتيس، بمساعدة لاعب الجمباز السابق فيكتور كانو، استغلو تغييرات قوانين اللعبة اللي تبدلات فـ2023 باش يدخلو أسلوب جديد فيه الفرجة، الأكروبات والإبداع الفني
.
وهاد التألق الإسباني خلا بزاف المتابعين المغاربة يطرحو سؤال مهم علاش المغرب ما يكونش عندو منتخب قوي فالسباحة الفنية؟ المواهب موجودة والبنيات الرياضية كتكبر عام بعد عام، غير خاص اهتمام ودعم حقيقي لهاد الرياضة اللي كتجمع بين الفن، اللياقة والانضباط، ياكما يكون عندنا حتى حنا رقصة عالمية على أغنية ”عومي الشيخة عومي “