محمد سقراط-كود///
فاش وهبي كيقوليهم راه عار على المغرب مزال كيزوج القاصرات، كيقولوا عليه باغي يغير شرع الله، وفاش جا خليجي يطبق شرع الله في بلاد الإسلام، وعيط لصحابو يجيو يتزوجوا القاصرات ناضوا كيغوتوا وا دولتاه، راه جايين الخليجيين كيشجعوا على الزواج من القاصرات، راه وهبي باغي يحمي القاصرات من الزواج من المغاربة والأجانب وكولشي، كيقولها ويعاودها بلاصة البنات هي المدرسة ماشي الزواج، وطبعا تعرض لهجوم وتكفر وتزندق وعتابروه من رجال الشيطان في أرض الإسلام، ومحرشاه الماسونية على المغاربة وعقيدتهم ودينهم.
بما أن القانون باقي مكيمنعش زواج القاصرات ومكيحميهمش من الزواج المبكر لأنه آفة اجتماعية وحقوقية وجريمة في حق هاد الطفلات وفي حق البلاد ككل، إذن شنو العيب إلى خليجي تزوج قاصر او جوج او تلاتة او ربعة وعيط لصحابو حتى هوما يتزوجوا بالعرام، مادارش شي حاجة مخالفة للقانون أو للشرع لي كيتذرعوا بيه هادوك أي ضد منع تزويج القاصرات، واش موشكليتهم مع الخليجي مايجيش يدير الحلال في البلاد لأنه ميسر وعندو باش، أو موشكيلتهم أنه دار الحلال مع القاصرات، ذإن هنا خاص منع تزويج القاصرات للمغاربة والأجانب وكولشي، ماشي هانية إلى كان معلم او فقيه مغربي وماهانياش إلى كان خليجي.
باش البلاد تحمي القاصرات راه خاص تدير قوانين لحمايتهن وتكون كتطبق على الجميع، حماية القاصرات مخاصش تكون غير في الفايسبوك بالإدانات والتنديد، خاص أولا قانون واضح كيمنع تزويج القاصرات نهائيا، وإجبارية التمدرس البنت لي تمنك المدرسة يمشيو ليها حتى للدار يسولوا علاش، أما ماحد مكاينش هاد القوانين راه غادي يبقى يتزوج بيهم الخليجي والإفريقي والهندي والبنغلاديشي وأي جنسية، ولي مادارش فيديو واضح بحال داك خونا راه كيسيفط أوديو في واتساب فيه تفاصيل كثر، طبعا الزواج بالأجانب أنا ماشي ضدو بل العكس راه هو لي ساهم في تطور البشرية وغلبة الهونوسابيان على باقي أنواع البشر، ولكن أن القيامة تنوض على خليجي شجع الزواج القانوني بقاصرات مغربيات، بينما الوزير وهبي شعرو شاب في محاولة إقناع المغاربة بلي زواج القاصرات راه جريمة مجتمعية وعيب وعار، هادشي بصح كارثة حقيقية.