كود -وكالات //
تباعت لوحة « 7A، 1948» ديال الفنان الأمريكي Jackson Pollock بثمن خيالي وصل لـ181 مليون دولار، فواحد المزاد الكبير اللي تنظّم فدار Christie’s فنيويورك. لبارح 18 ماي .
المزاد عرف منافسة سخونة دامت 7 دقايق، وقدر الفنان “بولوك” يحطم الرقم القياسي القديم ديالو بكثر من 3 مرات، حيث قبل خمس سنين حقق أعلى ثمن وصلت ليه شي لوحة ديالو ب 61.2 مليون دولار.
لوحة «رقم 7A، 1948» اللي ترسمات عام 1948، كتعتبر من أشهر الأعمال ديال بولوك وأكثرها تأثير فالفن الحديث، خصوصاً أنه كان معروف بالأسلوب ديالو المختلف اللي كيعتمد على “التنقيط” أو “التقطير”، واللي خرج بيه على القواعد التقليدية ديال الرسم فـالقرن العشرين وبدّل نظرة العالم للفن التشكيلي.
وماكانش هاد البيع غير صفقة عادية، ولكن حدث كبير فعالم الفن المعاصر، خصوصاً أن الأعمال اللي تباعات كانت ضمن المجموعة الفنية ديال رجل الإعلام الأمريكي الراحل Samuel Irving Newhouse، اللي كان من أكبر جامعي اللوحات الفنية فالعالم.
المزاد عرف حتى بيع منحوتة «دانايد» للنحات الروماني Constantin Brancusi بثمن فات 107 ملايين دولار.
أما الفنان الإسباني Joan Miró فسجل رقم قياسي جديد بعدما تباعات اللوحة ديالو «بورتريه مدام K» اللي رسمها عام 1924 بـ53.5 مليون دولار.
وبالنسبة لأعمال Pablo Picasso، بقات محافظة على القيمة الكبيرة ديالها فسوق الفن العالمي، حيث تباعات منحوتة «رأس امرأة (فرناند)» بـ48.3 مليون دولار، وهي عمل راجع لعام 1909.
كما تباعات لوحة «رجل هاز غيتارا» بـ40.8 مليون دولار، ومنحوتة «المرأة الحامل – النسخة الأولى» بـ22.4 مليون دولار، ولوحة أخرى بعنوان «رأس امرأة» بـ14.4 مليون دولار.
هاد الأرقام الكبيرة كيبانو بوضوح باللي الأعمال الفنية الغابرة ديال الفنانين الراحلين ولات رمز للقوة الاقتصادية والمكانة الثقافية عند الأثرياء وهواة جمع الفن.