سهام البارودي ـ كود//
عندي مشكل كبير مع لي كايبغيو يسعاو بالدراري الصغار وكايخرجو لينا فكل عيد كبير بالتمسكين والتبوحيط وكايقولو ليك “بغينا نفرحو الوليدات”، باش باغي تفرح الوليدات؟ بحولي داير مياوستين ألف ريال؟ صردي ملكي داير مليون؟ واش كاتبوهل علينا ولاّ؟
لي باغي يفرح الوليدات كايفرحهم العام كامل ماشي تال العيد الكبير، كايفكر ليهم أصلا قبل مايولدهم وكايوجد ليهم حياة نقية ومريحة وكريمة قبل مايتزادو، ماشي تاكايتزادو عاد كايبدا يبكي على العيد الكبير !
بنادم كايخبي الفشل ديالو مورا “الوليدات”، كايبغي يسعى باسم “الوليدات”، هوا باغي الحولي لراسو هو باش يبان بيه قدام الجيران والعائلة والصحاب ولكن عوض يخرج ليها نيشان كايبدا يتمسكن! حيت أنا كانعرف لي بصّح كايبغي يفرح الوليدات راه كايفكر ليهم العام كامل، الوليدات خاصهم ياكلو مزيان العام كامل ويلبسو مزيان العام كامل، ويوفروا ليهم واليديهم ظروف مزيانة وقراية مزيانة وهوايات وأنشطة…. عاد نشوفو الحولي د العيد الكبير! واحد كاتلقاه ماعمرو مادا معاه ولدو تال القهوة، ماشاريش ليه تا بشكليطة يلعب بيها وقاليك باغي يشري الحولي باش يفرحو !
نتا ولادك مظاهر سوء التغذية كاتبان عليهم، حوايجهم كاشفين فوق من ظهرهم وسنانهم قاتلاهم السوسة وشبعانين عصا وتصرفيق وتنهصير، ماعمرك ماحاولتي تا تحفّظو جدول الضرب ديال ثلاتة! بقا لمّك غا الحولي !
آ سيرو باراكا من القوالب، لا بغيتي تفرح الوليدات شري ليهم كلب، كانيش وسمّيه ميلود راه غايفرحو بيه بزاف واكثر من الحولي وغايتعلمو معاه المسؤولية وغايعطيهم الحنان والحب لي ربما نتا براسك ماقادش تعطيه ليهم.