محمد سقراط-كود///
واش المغرب باغي يولي دولة شيوعية كيفاش منع الشناقة.. الكساب كيدخل للسوق بالليل كيلقى الشناق فايق حتى هو مع بونبر وكيشري من عندو بالخاطر، الكساب حتى هو راه كيتقدى خروفات من داك السوق نيت او علف او اي حاجة محتاج ويرجع بحالو لدارو.. الشناق كيبقى يتسنى العياد حتى يفيق على خاطرو ويقضي شغالو وفاش تشيط ليه شي ساعة يمشي فيها للسوق يتقدى وهو وشطارتو، وماشي مجبر على انه يشري فلوسو راه في جيبو .. واش بغيتو الكساب يبقى يتسناه من بوننبر حتى للجوج ديال النهار حتى يجي على خاطرو.. واش هاد الدولة هبلت ودايرة الخاطر لشعيبة، الحولي مستحيل يرخاص والحكومة فرقات الدعم وكتسنى الحولي يرجع لثمن ماقبل الربيع العربي، راه اللحم في السوق دابا فايتة مية درهم للمليح، يعني الكساب لاش غادي يتعذب ويهبط للمدينة ويبقى يتسنى العياد، راه الگزار موجود كيشري العام كامل.
هاد شيطنة الشناق المبالغ فيها راه فيها بزاف ديال التخلف والعجز والريحة الغمولية والشيوعية وريحة عقلية الجيران، الشناق ركيزة أساسية في عملية بيع المنتوجات الفلاحية بجميع أنواعها، الشناق راه كيشري من عند الفلاح الغلة باقا في الأرض كيقمر عليها، والفلاح مكيجمع مكيحط مكيبقى يدور في السواق، كذلك الكساب راه كيبيع للشناق الحولي ويشري من عندو نيت النعجة والخروف، دابا على مايبدو الدولة باغا الكساب يهاجر بلادو ودارو ويخلي ولادو ويجي لسوق الحولي يبقى عايش بأتاي والحرشة ومضارب مع الشفارة يوميا ويدوز جوج سيمانات او تلاتة عايش عيشة الكلب حتى جلابتو مايبدلها، ويبقى يتسنى الموظف حتى تدوزليه الدولة الصالير قبل آخر الشهر ويجي للرحبة يقلب على الصردي بالگرون.
ميريكان لي أعظم إقتصاد في العالم كيسيروه الشناقة من وول ستريت، عندهم شارع خاص فيه أكبر المؤسسات المالية وبورصة نيويورك عاصمة الشناقة الكبار في العالم، يقدر يوصل التداول فيها حتى لترليون دولار، ومن ركائز اقتصاد البلاد.. بينما المغرب دولة كتقاتل باش توصل ل200مليار ديال الناتج الداخلي راه الدولة مخرجة القايد كيقلب على الشناقة في سوق الحولي.. واحد داخل لسوق بفلوسو كيشري ويعاود يبيع شنو الجريمة لي كيدير باش يتمنع او بتحارب.. راه الشاري لي كانبو وفيه اللهطة والجوع اما معجبوش الثمن يخلي فلوسو في جيبو وداك الساعة الشناق غادي يبيع بالخسارة تحت شعار: خسارة زربانة حسن من ربح معطل.