كود – كازا //
كيف ما سبق و طلب موقع كود باعتماد البيع بالكيلو فإطار الرؤية الاستباقية و تحليلو للأحداث، ومتابعتو للتطورات المرتبطة بسوق الغنم http://bit.ly/3PlI2Lg
الحكومة المغربية قررات دير إجراءات استثنائية باش تنظم أسواق بيع الحولي ديال عيد الأضحى، باش تنقص من الغلا وتحارب المضاربة اللي كتعاود كل عام مني كيقرب العيد.
هاد القرار جا من بعد ما وافق مجلس المنافسة على طلب استعجالي دارتو رئاسة الحكومة، كيسمح باتخاذ تدابير مؤقتة غتبقى حتى لـ3 يونيو 2026 ولي من بينها إمكانية للبيع بالكيلو.
ومن بين أبرز الإجراءات اللي شدات الانتباه، كاين احتمال يتم اعتماد بيع الحولي بالكيلو إلا شافت الحكومة أن الوضع فالأسواق كيتطلب هاد الشي، خصوصاً مع تخوف المواطنين من استمرار ارتفاع الأسعار بشكل كبفوت القدرة الشرائية ديال بزاف العائلات المغربية.
وأكدات رئاسة الحكومة أن هاد التدابير داخلة فإطار حماية المستهلك وضمان الشفافية فالمعاملات التجارية وسط أسواق بيع الحولي، وزادت قالت باللي الهدف هو الحفاظ على المنافسة الحرة ومحاربة الاحتكار والتلاعب فالأسعار.
وشملات الإجراءات الجديدة حصر بيع الحولي غير فالأسواق المرخصة قانونياً، مع السماح ببعض عمليات البيع المباشر ولكن بشروط وضوابط محددة، كما فرضات على الكسابا والبياعة يصرحو مسبقاً بهوياتهم وعدد الحوالا اللي غيعرضو للبيع والمصدر ديالها قبل ما يدخلو للسوق.
وزادت الحكومة منع شراء الحولي باش يتعاود يتباع وسط الأسواق، فمحاولة منها تحبس نشاط الشناقة والوسطاء اللي كيساهمو فرفع الأسعار ،وحتى تخزين الحولي برا المسالك التجارية المعتادة تولى ممنوع إلا كان الهدف هو خلق الندرة ولا التأثير على السوق.