كود – كازا //
علنات الوكالة المغربية لتنمية الاستثمارات والصادرات، المعروفة بـ AMDIE، بشراكة مع وزارة الشباب والثقافة والتواصل، على أول مشاركة رسمية للمغرب فمعرض Gamescom 2026، اللي كيتعتبر أكبر معرض عالمي خاص بألعاب الفيديو وصناعة الـGaming.
هاد المشاركة جاية فإطار الاستراتيجية ديال الوكالة باش تشجع القطاعات اللي عندها إمكانيات كبيرة باش اكبر، وتعاون الشركات المغربية باش تخرج للأسواق الدولية، خصوصاً فمجال الصناعات الرقمية والإبداعية.
وكتنسجم هاد الخطوة حتى مع الرؤية ديال سيدنا، اللي كتهدف باش المغرب يولي مركز إقليمي فالابتكار والاقتصاد الرقمي والصناعات الإبداعية، مع خلق فرص أكثر للشباب المغربي وإدماجهم فأسواق عالمية عندها قيمة مضافة كبيرة.
و غادي يتنظم معرض Gamescom ما بين 26 و30 غشت 2026 بمدينة Cologne فألمانيا، وكيجمع كل عام مطورين وناشرين ومستثمرين وصناع محتوى وشركات من مختلف أنحاء العالم، باش يتلاقاو هلى آخر التطورات التكنولوجية وفرص الشراكة والبزنس فمجال الألعاب الإلكترونية.
هاد المشاركة كتعكس الدينامية اللي ولى كيعرفها المغرب فصناعة الألعاب الإلكترونية، بفضل شباب مبدع وكفاءات معروفة، مع بيئة مناسبة لتطوير الصناعات الرقمية،كما كتبان الرغبة ديال AMDIE فدعم جيل جديد من الشركات الناشئة المغربية، باش يطور حلول مبتكرة، ويبني شراكات استراتيجية، ويدخل للأسواق العالمية.
